60 წლის მამაკაცი დააკავეს შაბათს საღამოს ესტონეთის უდიდეს სავაჭრო ცენტრში სანაგვე ურნის აფეთქებასთან დაკავშირებით, რის შედეგადაც ერთი ადამიანი დაშავდა.
აფეთქება ტალინში მდებარე სავაჭრო ცენტრ „იულემისტეში“ მოხდა, რამაც 20 დეკემბრის საღამოს 7 საათზე მოლის ტერიტორიიდან ადამიანების ევაკუაცია გამოიწვია. დაშავდა ერთი თანამშრომელი, რომელსაც ჰოსპიტალიზაცია დასჭირდა.
კვირას გამართულ პრესკონფერენციაზე, ესტონეთის გენერალურმა პროკურორმა, ასტრიდ ასიმ განაცხადა, რომ მომხდართან დაკავშირებით, დაკავებულია ტალინში მცხოვრები 60 წლის მამაკაცი.
„არსებობს საფუძვლიანი ეჭვი, რომ ქმედების მოტივი პირადი შურისძიება იყო და ამავე სავაჭრო ცენტრთან წარსულში არსებულ კავშირებს უკავშირდება. დაკავებულ პირს სავაჭრო ცენტრისთვის ზიანის მიყენების სურვილი გააჩნდა“, – განუცხადა მან მედიას.
ასის თქმით, ეჭვმიტანილი არ არის ესტონეთის მოქალაქე, ის მოქალაქეობის არმქონე პირია და სისხლის სამართლის წესით არაერთხელ არის ნასამართლევი. ამჟამად მამაკაცს სამართალდამცავები კითხავენ.
გენერალური პროკურორის განმარტებით, ასაფეთქებელი მოწყობილობა ხელნაკეთი იყო.
შიდა უსაფრთხოების სამსახურის გენერალურმა დირექტორმა, მარგო პალოსონმაც დაადასტურა, რომ ეჭვმიტანილი უკვე შაბათ საღამოს იყო იდენტიფიცირებული, ხოლო მისი ქმედების მოტივი – დადგენილი. პალოსონის განცხადებით, საზოგადოებისთვის შექმნილი საფრთხე „განეიტრალებულია“.
„არ არსებობს იმის ნიშანი, რომ ეს ამბავი დაკავშირებულია ტერორიზმთან, ექსტრემიზმთან, ან უცხო ქვეყნიდან იმართებოდა,“ – აღნიშნა პალოსონმა.
პოლიციისა და სასაზღვრო დაცვის დეპარტამენტის (PPA) გენერალურმა დირექტორმა, ეგერტ ბელიჩევსმა პრესკონფერენციაზე ხაზგასმით თქვა, რომ ეჭვმიტანილის დაკავების მიუხედავად, პოლიციამ, უსაფრთხოების განცდის ასამაღლებლად, პატრულირება გაზარდა.
გაძლიერებული პატრულირება
ბელიჩევსი ამბობს, რომ შობის წინა შაბათ-კვირას მომხდარი აფეთქება „ბევრში შიშსა და დაბნეულობას იწვევს“.
„საზოგადოებაში უსაფრთხოების განცდის შესანარჩუნებლად, ჩვენ გადავწყვიტეთ, სადღესასწაულო პერიოდში ხალხმრავალ ადგილებში ჩვენი თანამშრომლების ყოფნა და ხილვადობა გავზარდოთ“, – აღნიშნა მან თავის განცხადებაში.
პოლიცია, მთელი ესტონეთის მასშტაბით, სავაჭრო ცენტრებსა და მათ უსაფრთხოების სამსახურებს დაუკავშირდა და მითითებები გადასცა.
PPA-ს ცნობით, რომ თუ ვინმე საეჭვოდ მიტოვებულ ნივთს ან ადამიანების უცნაურ ქცევას შეამჩნევს, ამის შესახებ 112-ის სამსახურს უნდა აცნობოს.
სამაშველო სამსახურის ექსპერტებმა ღამით სავაჭრო ცენტრ „იულემისტეს“ ყველა სანაგვე ურნა შეამოწმეს და დაადასტურეს, რომ სხვა საეჭვო მოწყობილობები ვერ ნახეს და დამატებითი საფრთხე არ გამოვლენილა.
კვირას დილით, შიდა უსაფრთხოების სამსახურმა მომხდარს „იზოლირებული ინციდენტი“ უწოდა და, წინასწარი მტკიცებულებების საფუძველზე, ტერორისტული საფრთხე გამორიცხა.
„ამ დროისთვის არაფერი მიუთითებს იმაზე, რომ ტერორიზმთან ან ექსტრემიზმთან გვაქვს საქმე. საფრთხის დონე არ გაზრდილა და არსებული მტკიცებულებები იზოლირებულ ინციდენტზე მეტყველებს“, – განაცხადა პალოსონმა.
„იულემისტეს“ სავაჭრო ცენტრის მარკეტინგისა და კორპორატიული სოციალური პასუხისმგებლობის ხელმძღვანელი, ტიია ნიმი ამბობს, რომ აფეთქება ყველასთვის მოულოდნელი იყო.
„ვიზიტორებისა და თანამშრომლების უსაფრთხოება ყოველთვის ჩვენი მთავარი პრიორიტეტია. საგამოძიებო ორგანოებთან მჭიდროდ ვთანამშრომლობთ. გამოძიების დასრულებამდე, ინციდენტის დეტალებზე კომენტარს ვერ გავაკეთებთ. დაშავებულს სწრაფ გამოჯანმრთელებას ვუსურვებთ“, – აღნიშნა მან.
„პოლიციისა და სასაზღვრო დაცვის დეპარტამენტმა დაგვიდასტურა, რომ საფრთხე არ არსებობს და, ვიზიტორების მისაღებად, ცენტრის გახსნა შეიძლება. ჩვენ უსაფრთხოების პროცედურებს გადავხედეთ და დაცვის პერსონალის რაოდენობა გავზარდეთ, რათა ყველა ვიზიტორისა და თანამშრომლის უსაფრთხოება უზრუნველვყოთ. შეგვიძლია დავადასტუროთ, რომ მოლი „იულემისტე“ უსაფრთხოა და ვიზიტორებს შეუძლიათ, საყიდლებზე მობრძანდნენ“, – დასძინა ნიმმა.
გამოძიებას ესტონეთის შიდა უსაფრთხოების სამსახური აწარმოებს, საქმეს კი ჩრდილოეთ ოლქის პროკურატურა უწევს ზედამხედველობას.
