ნიკოლას მადუროს დაკავება იყო „სამართალდამცავი ოპერაცია“, – განაცხადა ორშაბათს გაეროში ამერიკის შეერთებული შტატების ელჩმა გდა ხაზგასმით აღნიშნა, რომ აშშ „არ ახდენს ქვეყნის ოკუპაციას“.
მაიკ უოლცმა ვენესუელაში აშშ-ის სამხედრო მოქმედება აღწერა, როგორც „ქირურგიული სიზუსტის სამართალდამცავი ოპერაცია, რომელიც ამერიკელმა სამხედროებმა განახორციელეს ამერიკული მართლმსაჯულების მიერ ძებნილი ორი ბრალდებულის – ნარკო-ტერორისტ ნიკოლას მადუროსა და [მისი მეუღლის] სილია ფლორესის წინააღმდეგ“.
მან გაეროს უშიშროების საბჭოს სხდომაზე განაცხადა, რომ მადურო პასუხისმგებელია „ამერიკის შეერთებული შტატების ხალხზე თავდასხმებში, დასავლეთ ნახევარსფეროს დესტაბილიზაციასა და ვენესუელელი ხალხის უკანონო რეპრესიებში“.
„ვენესუელისა და მისი ხალხის წინააღმდეგ ომი არ მიმდინარეობს. ჩვენ არ ვახდენთ ქვეყნის ოკუპაციას. ამერიკის შეერთებულ შტატებს ვენესუელისთვის უკეთესი მომავალი სურს. ჩვენ გვჯერა, რომ ვენესუელელი ხალხისთვის, რეგიონისა და მთელი მსოფლიოსთვის უკეთესი მომავალი ნიშნავს რეგიონის სტაბილიზაციას და იმ სამეზობლოს გაცილებით უკეთეს და უსაფრთხო ადგილად ქცევას, რომელშიც ჩვენ ვცხოვრობთ“, – განაცხადა ელჩმა.