4 იანვარს, ლიეტუვის ხელისუფლების წარმომადგენლებმა განაცხადეს, რომ ბალტიის ზღვაში, ლატვიის საპორტო ქალაქ ლიეპაიასთან, ლიეტუვასა და ლატვიის დამაკავშირებელი წყალქვეშა ბოჭკოვან-ოპტიკური კაბელი დაზიანდა.
ლიეტუვის კრიზისების მართვის ეროვნული ცენტრის განცხადებით, შვენტოიისა (ლიეტუვა) და ლიეპაიას (ლატვია) დამაკავშირებელი საზღვაო კაბელის დაზიანების გამო, ლიეტუვის ხელისუფლება ლატვიის შესაბამის სამსახურებთან მჭიდრო კავშირში იმყოფება.
ლატვიის პოლიციამ საინფორმაციო პორტალ „დელფის“ განუცხადა, რომ დაზიანების სავარაუდო მიზეზად გემი სახელდება. ეროვნული შეიარაღებული ძალების სანაპირო დაცვის სამსახურის ანალიზის საფუძველზე, გემი თავიდან არააქტიური კაბელის გასწვრივ მოძრაობდა, მაგრამ შემდეგ კურსი შეიცვალა და გადაუარა აქტიურ კაბელს, რის შედეგადაც ის დაზიანდა.
კვირას პოლიციამ, სანაპირო დაცვისა და შიდა უსაფრთხოების სამსახურის თანამშრომლებთან ერთად, დაათვალიერა გემი, რომელიც ამჟამად ლიეპაიას პორტშია გაჩერებული. ხელისუფლებას ამ გემის ეკიპაჟთან მუდვივი კავშირი აქვს.
არც გემი და არც მისი ეკიპაჟი არ დაუკავებიათ. პოლიციის ინფორმაციით, ეკიპაჟი სამართალდამცავებთან თანამშრომლობს და ინციდენტის გარემოებების დადგენის პროცესში ეხმარება.
„დელფის“ ცნობით, ლატვიის ხელისუფლებამ დაზიანების შესახებ პირველად ლიეტუვის კრიზისების მართვის ცენტრიდან შეიტყო. ცენტრის ხელმძღვანელის, არვის ზილეს თქმით, მან ხელისუფლებას აცნობა, რომ კერძო მფლობელობაში არსებული კაბელი, სავარაუდოდ, პარასკევს დაზიანდა.
ზილეს განცხადებით, პირველადი შეფასების შემდეგ, მომხდარის თაობაზე შესაბამის უწყებებს და კაბელის მფლობელს ეცნობა.
ლატვიის პრემიერ-მინისტრმა, ევიკა სილინამ პლატფორმა X-ზე დაწერა, რომ ბალტიის ზღვაში, ლიეპაიას მახლობლად გამავალი კერძო კაბელის დაზიანება დადასტურდა.
ხელისუფლება ხაზგამით ამბობს, რომ მომხმარებლების მომსახურება როგორც ლიეტუვაში, ისე ლატვიაში ჩვეულ რეჟიმში გრძელდება და შეფერხებები მოსალოდნელი არ არის.
დაახლოებით ერთი წლის წინ, მას შემდეგ, რაც რამდენიმე წყალქვეშა სატელეკომუნიკაციო და დენის კაბელი, სავარაუდოდ, დივერსიის შედეგად დაზიანდა, ნატო-მ რეგიონში მონიტორინგის მისია დაიწყო, რომელიც Baltic Sentry-ის სახელით არის ცნობილი.
სულ რამდენიმე დღის წინ კი, ახალი წლის ღამეს, ასევე დაზიანდა კომპანია „ელისას“ წყალქვეშა კაბელი, რომელიც ფინეთსა და ესტონეთს აკავშირებს. მოგვიანებით, ფინეთის პოლიციამ ეკიპაჟის 14 წევრთან ერთად, დააკავა 132 მეტრი სიგრძის გემი „ფიტბურგი“, რომელიც სანქტ-პეტერბურგიდან (რუსეთი) ჰაიფაში (ისრაელი) მიდიოდა. ფინეთის ყურეში გამავალი სატელეკომუნიკაციო კაბელი, სავარაუდოდ, ამ გემის ღუზამ დააზიანა.
https://www.lrt.lt/en/news-in-english/19/2797059/undersea-cable-between-lithuania-and-latvia-damaged-near-liepaja