პროპაგანდაში დადანაშაულების შემდეგ, შვეიცარიულმა სატელევიზიო პროგრამების ოპერატორებმა, Swisscom-მა და Sunrise-მა კატარული არაბულენოვანი არხი „ალ ჯაზირა“ (Al Jazeera Arabic) თავიანთი შეთავაზებებიდან ამოიღეს.
პრეს-სპიკერმა შვეიცარიულ საინფორმაციო სააგენტო „კინსტონს“ განუცხადა, რომ სანამ ბრალდებები არ გადამოწმდება, არაბულენოვანი „ალ ჯაზირა“ პროგრამაში აღარ გამოჩნდება. ამით გაზეთ Sonntagsblick-ის მიერ გავრცელებული ინფორმაცია, ფაქტობრივად, დადასტურდა – აღნიშნულმა საკვირაო გაზეთმა დაწერა, რომ 2025 წლის 10 დეკემბრის შემდეგ, არაბულენოვანი „ალ ჯაზირა“ შვეიცარიის ეთერში არ გასულა, რადგან ხშირად მისი კონტენტი „რუხ სამართლებრივ ზონაში“ იმყოფება.
ამასთან, „ალ ჯაზირას“ ინგლისურენოვანი არხი, რომელიც დასავლურ აუდიტორიაზეა გათვლილი, კვლავ შედის ორივე ოპერატორის შეთავაზებებში.
Sonntagsblick-ი ასევე იტყობინება, რომ პროისრაელურმა ჯგუფმა „ფოკუს ისრაელმა“ შვეიცარიული ოპერატორები საკამათო არხის ტრანსლირების გამო გააკრიტიკა. მისი კრიტიკა, თავის მხრივ, ეფუძნება ისრაელის „მეირ ამიტის დაზვერვისა და ტერორიზმის საინფორმაციო ცენტრის“ ანგარიშს, რომლის მიხედვითაც, არაბულენოვანი „ალ ჯაზირა“, წლების განმავლობაში, „ჰამასის“ სასარგებლოდ ეწეოდა პროპაგანდას. ანალოგიური ბრალდებები ისრაელის არმიამაც წამოაყენა, რაც „ალ ჯაზირამ“ უარყო.
„ჰამასის“ აკრძალვა შვეიცარიაში 2025 წლის მაისიდან მოქმედებს. ეს ზომა ასევე ეხება ასოციაციებსა და ჯგუფებს, რომლებიც „ჰამასის“ სახელით ან მის სასარგებლოდ მოქმედებენ.
https://www.swissinfo.ch/eng/various/al-jazeeras-arabic-version-suspended-from-swiss-tv-programming/90731874