„ხალხის ძალის“ წევრი დავით ქართველიშვილი, „დღის ქრონიკაში“ საქართველოს ყოფილი პრემიერ-მინისტრის, ირაკლი ღარიბაშვილის დაკავების ფაქტს გამოეხმაურა.
როგორც მან აღნიშნა, არცერთი დანაშაული დაუსჯელი არ უნდა დარჩეს.
„ირაკლი ღარიბაშვილი ყველას გვახსოვს როგორც ახალგაზრდა, ნიჭიერი ქართველი პოლიტიკოსი, რომელსაც მთელი ქვეყანა გულშემატკივრობდა. მან კონკრეტული დანაშაული ჩაიდინა, რომელიც აღიარა და ის, ზოგიერთივით არ გაქცეულა ევროპაში, არ იმალება გერმანიასა თუ საბერძნეთში. მას მოუწევს იმ სასჯელის მოხდა. პირადად მისთვის კატასტროფული არაფერი მომხდარა.
ძალიან სამწუხაროა, რომ საქართველოში პოლიტიკოსების მთელი პლეადა, როგორც ჩანს, ძალაუფლებას ვერ უძლებს, ვერ უძლებს ნდობას, რომელსაც მათ ბიძინა ივანიშვილი და „ქართული ოცნება“ უცხადებთ. გული მტკივა რაც მოხდა, არა მხოლოდ ირაკლი ღარიბაშვილის მისამართით, არამედ გრიგოლ ლილუაშვილისა და სხვა ბევრი ადამიანის მისამართით.
ჩემთვის უფრო მეტი უბედურება იქნებოდა, თუკი ხელისუფლება, მხოლოდ იმიტომ, რომ ეს ადამიანები იყვნენ პოლიტიკური გუნდის ყოფილი წევრები, დამალავდა ან არ იმოქმედებდა ისე, როგორც იმოქმედა.
ყველას აქვს უფლება იცხოვროს ისე, როგორც ცხოვრობს, ძალიან ცუდია, როცა ეს უფლება გადადის კონკრეტულ დანაშაულში, მაგრამ არცერთი დანაშაული დაუსჯელი არ უნდა დარჩეს.
არ მახსოვს სააკაშვილის პერიოდში რომელიმე გახმაურებული საქმე, რომელიც აღიძრა ან მისი პერიოდის რომელიმე პრემიერის, მინისტრის ან მინისტრის მოადგილის მისამართით. ეს სრულიად არ ნიშნავს იმას, რომ მის პერიოდში არ ხდებოდა სამსახურეობრივი უფლებამოსილების გადამეტება, არ იყო კორუფცია და არ იყო ათასზე უფრო მძიმე დანაშაული, ვიდრე ირაკლი ღარიბაშვილის შემთხვევაში გვაქვს, მაგრამ დღეს ხელისუფლებამ აირჩია ეს ტაქტიკა, საკუთარ რიგებში არცერთი კორუმპირებული, არცერთი დამნაშავე“, – აღნიშნა დავით ქართველიშვილმა.
ირაკლი ღარიბაშვილს 5 წლით პატიმრობა და 1 მილიონი ლარის ოდენობით ჯარიმა განესაზღვრა.