მგზავრი თვითმფრინავის Wi-Fi-ის ქსელს ისეთი სახელით მიუერთდა, რომელიც ბორტზე ასაფეთქებელი მოწყობილობის არსებობაზე მიანიშნებდა.
„თურქეთის ავიახაზების“ კუთვნილი თვითმფრინავი, რომელიც სტამბოლიდან ესპანეთში მიფრინავდა, 15 იანვარს ბარსელონას ელ-პრატის აეროპორტში ავარიულად დაეშვა. თუმცა, ბოლოს გაირკვა, რომ ბომბის აფეთქების მუქარა, სინამდვილეში, ერთ-ერთი მგზავრის ხუმრობა აღმოჩნდა.
აეროპორტის მფლობელმა კომპანია AENA-მ ინციდენტი სოციალურ ქსელებში დაადასტურა, რომელიც „ფრენისთვის შექმნილი საშიშროების“ შესახებ დილის 10:00 საათზე მიღებულ შეტყობინებას მოჰყვა.
თვითმფრინავი, რომლის ბორტზეც 148 მგზავრი და ეკიპაჟის 7 წევრი იმყოფებოდა, აეროპორტში დაგეგმილზე ნახევარი საათით გვიან, დაახლოებით 11:00 საათზე დაეშვა. ადგილზე უკვე მობილიზებული იყო უსაფრთხოების ძალები. საჰაერო ხომალდი, სასწრაფო შემოწმებისთვის, უმალვე გადაიყვანეს სპეციალურ ზონაში.
AENA-ს განცხადებით, უსაფრთხოების პროტოკოლების ამოქმედებისა და საფრთხის შეფასების შემდეგ, „განგაშის სიგნალი გაუქმდა“. „თურქეთის ავიახაზების“ ცნობით კი, ყველაფერი იმ მგზავრის ხუმრობამ გამოიწვია, რომელმაც თვითმფრინავის Wi-Fi-ს ქსელს ისეთი სახელით მიუერთდა, რომელიც ბორტზე ასაფეთქებელი მოწყობილობის არსებობაზე მიანიშნებდა.
სამოქალაქო თავდაცვის სამსახურის ცნობით, მგზავრებმა და ეკიპაჟის წევრებმა ბორტი დამოუკიდებლად დატოვეს. თვითმფრინავის შემოწმება „სამოქალაქო გვარდიამ“ განახორციელა. ოპერაციაში ასევე ჩართულნი იყვნენ ეროვნული პოლიცია, კატალონიის პოლიცია და სახანძრო ბრიგადა.
კატალონიის პოლიციამ აღნიშნა, რომ „სავარაუდო მუქარას აეროპორტის მუშაობაზე არანაირი გავლენა არ მოუხდენია“. თავის მხრივ, AENA-მაც დაადასტურა, რომ მთელი ამ დროის განმავლობაში აეროპორტი „ჩვეულ რეჟიმში“ ფუნქციონირებდა.
https://www.rtve.es/noticias/20260115/avion-aterriza-emergencia-barcelona-amenaza/16895484.shtml