რუსეთის საგარეო საქმეთა სამინისტროს მიერ სოციალური ქსელით გავრცელებულ ინფორმაციაში აღნიშნულია, რომ „ანტიქრისტეს“ მიზანში ლიეტუვა და ბალტიის ქვეყნები ჰყავს ამოღებული. ეს განცხადება, თავდაპირველად, რუსეთის სადაზვერვო სამსახურებმა ლიეტუვაში იმ ახალი მართლმადიდებლური თემის შექმნის საპასუხოდ გაავრცელეს, რომელმაც მოსკოვთან კავშირი გაწყვიტა.
რუსი ოფიციალური პირების მტკიცებით, მსოფლიო პატრიარქმა ბართლომემ, რომელსაც მოსკოვი მანამდე „მართლმადიდებლური უკრაინის გახლეჩაში“ ადანაშაულებდა, ახლა, სავარაუდოდ, ბალტიის ქვეყნებს მიაპყრო თავისი „ბნელი მზერა“. ლიეტუვაში არსებულმა მართლმადიდებელ ქრისტიანთა ჯგუფმა მოსკოვთან კავშირი 2022 წელს, უკრაინაში რუსეთის შეჭრისა და მოსკოვის საპატრიარქოს დაქვემდებარებაში მყოფი ლიეტუვის მართლმადიდებელი ეკლესიის ხელმძღვანელობის მიერ ომის მხარდაჭერის შემდეგ გაწყვიტა. მათ ახალი თემი ჩამოაყალიბეს, რომელიც კონსტანტინოპოლის მსოფლიო საპატრიარქოს დაექვემდებარა; ანალოგიურად მოიქცა უკრაინის მართლმადიდებლური თემიც 2019 წელს. ორშაბათს რუსეთის საგარეო დაზვერვის სამსახურმა და საგარეო საქმეთა სამინისტრომ ერთობლივი განცხადება გამოაქვეყნეს, რომელიც, ლიეტუვასა და ევროპის სხვა ქვეყნებში მიმდინარე მოვლენებთან დაკავშირებით, აპოკალიფსურ გამონათქვამებს შეიცავს. რუსეთის დაზვერვა ამტკიცებს, რომ მსოფლიო პატრიარქი არა მხოლოდ რელიგიური ლიდერი, არამედ მეტაფიზიკური საფრთხეა და „ხორცშესხმულ ეშმაკს“ წარმოადგენს, რომელიც ლიეტუვიდან, ლატვიიდან და ესტონეთიდან რუსული მართლმადიდებლობის განდევნას ცდილობს. ეს გზავნილი სოციალურ ქსელში გააკრიტიკა გინტარას სუნგაილამ – ერთ-ერთმა პირველმა მართლმადიდებელმა მღვდელმა ლიეტუვაში, რომელმაც მოსკოვის საპატრიარქოსთან კავშირის გაწყვეტის შესახებ განაცხადა.
„საინტერესოა, ექნებათ თუ არა რაიმე რეაქცია ლიეტუვაში, მოსკოვის საპატრიარქოს ეპარქიაში მომსახურე სასულიერო პირებს, რომლებსაც რუსეთის მოქალაქეობა აქვთ, იმ ფაქტზე, რომ მათი ხელისუფლება მართლმადიდებლური ეკლესიის პირველ და უპირატეს ეპისკოპოსს ანტიქრისტეს უწოდებს“, – აღნიშნა მან. ლიეტუვის მართლმადიდებელი ეკლესიის არქიეპისკოპოსმა, რომელიც მოსკოვის საპატრიარქოს დაქვემდებარებაშია, განაცხადა, რომ ბართლომეს შეურაცხყოფის ფაქტს გმობს. მან ასევე ხაზი გაუსვა, რომ „თანმიმდევრულად უჭერს მხარს მშვიდობას, ჰარმონიასა და სოციალურ ერთიანობას“. „კონფესიებს შორის მშვიდობა ჩვენთვის მეტად მნიშვნელოვანია და ნებისმიერ რელიგიურ დაპირისპირებას ვეწინააღმდეგებით. ამიტომ, ჩვენ ვერ მოვიწონებთ შეურაცხმყოფელ განცხადებებს რომელიმე ეკლესიის იერარქის მიმართ, მიუხედავად იმისა, ვეთანხმებით თუ არა მის შეხედულებებსა თუ მოქმედებებს. ეკლესიებს შორის წარმოქმნილი პრობლემები კანონიკურად და ყველა მართლმადიდებელ მორწმუნეს შორის დიალოგის გზით უნდა გადაწყდეს“, – განუცხადა ლიეტუვის ეროვნული ტელე-რადიო მაუწყებელს (LRT.lt-ს) მოსკოვის საპატრიარქოს დაქვემდებარებაში მყოფმა არქიეპისკოპოსმა.
https://www.lrt.lt/en/news-in-english/19/2806076/russia-claims-antichrist-is-targeting-lithuania