21 იანვარს, ევროპოლმა (ევროკავშირის პოლიციის სააგენტო) გამოაცხადა, რომ „ყველაზე მასშტაბური ოპერაციის“ დროს, გაანადგურა რამდენიმე ქვეყანაში მოქმედი სინთეტიკური ნარკოტიკების მწარმოებელთა მსხვილი ქსელი, რითაც ორგანიზებულ დანაშაულს „უზარმაზარი დარტყმა“ მიაყენა. სამართალდამცავებმა მაღალი წარმადობის 24 ლაბორატორიის ლიკვიდირება მოახდინეს და დაახლოებით 1000 ტონა ქიმიური ნივთიერება ამოიღეს, რომელიც გამოიყენებოდა ისეთი ნარკოტიკების დასამზადებლად, როგორიცაა MDMA (ექსტაზი), ამფეტამინი და მეტამფეტამინი. „ამ სფეროს კარგა ხანია ვიცნობ. ამიტომ. დაბეჯითებით შემიძლია ვთქვა, რომ ეს არის ყველაზე მასშტაბური ოპერაცია, რაც კი ოდესმე სინთეტიკური ნარკოტიკების წარმოებისა და გავრცელების წინააღმდეგ ჩაგვიტარებია“, – განაცხადა ევროპოლის ორგანიზებულ დანაშაულთან ბრძოლის ევროპული ცენტრის ხელმძღვანელმა, ენდი კრააგმა საინფორმაციო სააგენტო „ფრანს პრესთან“ ინტერვიუში. „ვფიქრობ, ეს მართლაც უზარმაზარი დარტყმაა იმ ორგანიზებული დანაშაულებრივი ჯგუფებისთვის, რომლებიც ნარკოტრაფიკში, კონკრეტულად კი, სინთეტიკური ნარკოტიკების ვაჭრობაში არიან ჩართულნი“, – დასძინა მან.
ოპერაციაში, რომელიც ერთი წელი გაგრძელდა, ჩართული იყო ბელგიის, ჩეხეთის, გერმანიის, ნიდერლანდების, პოლონეთის და ესპანეთის პოლიცია. კრააგის თქმით, დაკავებულია 85-ზე მეტი პირი, მათ შორის – ორი სავარაუდო ლიდერი, ორივე პოლონეთიდან. ეჭვები პირველად 2024 წელს გაჩნდა, როდესაც პოლონეთის პოლიციამ დააფიქსირა ქსელი, რომელსაც დიდი რაოდენობის ქიმიკატები ჩინეთიდან და ინდოეთიდან ლეგალურად შემოჰქონდა. მოგვიანებით, გამოძიებით დადგინდა, რომ ხდებოდა ამ ქიმიკატების ხელახალი შეფუთვა, მარკირების შეცვლა და ევროკავშირის მასშტაბით იმ ლაბორატორიებში განაწილება, სადაც სინთეტიკური ნარკოტიკები მზადდებოდა.
დაკავებულთა უმრავლესობა პოლონეთიდანაა, თუმცა დანაშაულებრივ ოპერაციებში ბელგიისა და ნიდერლანდების მოქალაქეებიც იყვნენ ჩართულნი.
„მიწოდების ჯაჭვზე დარტყმა“
კრააგმა აღნიშნა, რომ ოპერაციის ერთ-ერთი მიზანი აგრეთვე იყო „მიწოდების ჯაჭვზე“ დარტყმა, რათა სინთეტიკური ნარკოინდუსტრია თავად წყაროსთან განადგურებულიყო. „ ასეთ დანაშაულებრივ ჯგუფებს მომარაგება უკვე აღარ აქვთ“, – განუცხადა მან „ფრანს პრესს“. სინთეტიკური ნარკოტიკების მოხმარებელთა ჯანმრთელობასთან დაკავშირებული რისკების გარდა, კრააგმა ყურადღება ასევე გაამახვილა ძალადობის, კორუფციისა და ფულის გათეთრების პრობლემებზე, რომლებიც ამ დანაშაულებრივ სფეროში არსებობს.
მისი თქმით, სინთეტიკური ნარკოტიკების წარმოებას დამანგრეველი გავლენა აქვს გარემოზე. სამართალდამცავებმა ამოიღეს 120 000 ლიტრზე მეტი (31 700 გალონი) ტოქსიკური ქიმიური ნარჩენი, რომელსაც დამნაშავეები, როგორც წესი, მიწაზე ან ნაკადულებში ყრიან. „დღეს ეს დამნაშავეებისთვის შემოსავლის წყაროა, რომელიც ხვალ გარემოს დაბინძურებას გამოიწვევს“, – აღნიშნა კრააგმა. ევროპოლის მიერ წარმატებულად გამოცხადებული ოპერაციის შემდეგ, პოლიციის თვალთახედვის არეში სხვა სამიზნეებიც გამოჩნდა. „ეს იყო ერთ-ერთი უმსხვილესი დისტრიბუტორი, მაგრამ არა ერთადერთი. ასე რომ, ძებნას ვაგრძელებთ“, – დასძინა კრააგმა.
https://www.afp.com/en/agency/our-commitments/afp-charters