“ევროპული სასამართლო მაინც გამამართლებს, რადგან ჩემს სიმართლეში დარწმუნებული ვარ” – განაცხადა ბათუმის მოვლენებზე სისხლის სამართლის ბრალდებით დაკავებულმა ირაკლი ჩხვირკიამ სასამართლო პროცესზე. ჩხვირკია ამბობს, რომ საქმესთან დაკავშირებით მიცემული ჩვენებები აბსურდული და იდენტურია.
“ჩემი დაკავება 23 აპრილს მოხდა. საქმეზე დაიკითხა ხუთი მოწმე. მე, ბატონო მოსამართლე, კონკრეტულ დეტალებში არ შევდივარ, მაგრამ პირობას გაძლევთ, რომ დავამტკიცებ, რომ ჩვენებები არის აბსურდული. ამ საქმეში არანაირი დანაშაული არ ჩამიდენია. მოწმეები ამბობენ, რომ ჩემი გამოჩენის შემდეგ დაიწყო მანქანების დაწვა. მათივე მოპოვებული მასალები ჩემს წისქვილზე ასხამს წყალს. არც ერთი მოწმე არ იძახის, რომ ქვას ვისროდი, ან ვიგინებოდი. ყველა მოწმის ჩვენებაში „კოპი ფეისთით“ არის გადატანილი. აქციაზე სეპარატისტული მოწოდებები იყო, მე ამის წინააღმდეგი ვიყავი და სურვილი მქონდა, რომ გამეჩერებინა. ბუნებაში ჩემს მიერ ჩადენილი დანაშაული არ არის. ჩემი ოცნებაა სოხუმში უნდა წავიდე. სოხუმში ვერ წავალ თუ ამ ქვეყანაში ასეთი პოლიცია და სასამართლო იქნება. მე იდეალისტი ვარ. ამ პროცესთან მიმართებაში იდეალიზმს ვითხოვ. ორი თვეა ტყუილად ვზივარ ციხეში. მე ციხის არ მეშინია, გინდა 6 წელი მომისაჯოთ. ევროპული სასამართლო მაინც გამამართლებს, რადგან ჩემს სიმართლეში დარწმუნებული ვარ”,- განაცხადა ჩხვირკიამ.