რუსეთის პრეზიდენტის, ვლადიმერ პუტინის სპეციალური წარმომადგენლის, კირილ დმიტრიევის განცხადებით, „მშვიდობისკენ მიმავალი გზა“ დონბასის რეგიონიდან უკრაინის ჯარების გაყვანა იქნება. ამით მან, ფაქტობრივად, მოსკოვის ძველი მოთხოვნა გაიმეორა.
„დონბასის დატოვება უკრაინისთვის მშვიდობისკენ მიმავალი გზაა“, – დაწერა დმიტრიევმა სოციალურ ქსელ X-ში.
რუსეთი აღმოსავლეთ უკრაინაში დონბასის რეგიონის დაახლოებით 90 პროცენტს აკონტროლებს და დარჩენილი ნაწილის ხელში ჩასაგდებად ძალისხმევას აძლიერებს.
პუტინმა არაერთხელ განაცხადა, რომ მოსკოვი დონბასის დარჩენილ ნაწილს ძალით დაიკავებს, თუ უკრაინა ამ ტერიტორიას ნებაყოფლობით არ დათმობს.
გამოცემა„ფაინენშალ თაიმსის“ მიერ გავრცელებული ინფორმაციის თანახმად, ვაშინგტონში უკრაინის დელეგაციასთან გამართული შეხვედრის დროს, დონალდ ტრამპის ადმინისტრაციამ მიანიშნა, რომ აშშ-ის მიერ უკრაინისთვის უსაფრთხოების გარანტიების მიცემა შესაძლოა დამოკიდებული იყოს იმაზე, დათანხმდება თუ არა ოფიციალური კიევი სამშვიდობო შეთანხმებას, რომელიც დონბასის რეგიონის დათმობას ითვალისწინებს.
გასულ უქმეებზე უკრაინის, რუსეთისა და აშშ-ის დელეგაციების მონაწილეობით აბუ-დაბიში გამართული მოლაპარაკებებიც, ძირითადად, ტერიტორიული საკითხებს, მათ შორის დონბასის რეგიონს შეეხებოდა.
ვოლოდიმირ ზელენსკი: „დონბასის საკითხი საკვანძოა“
უკრაინის პრეზიდენტი, ვოლოდიმირ ზელენსკიც ადასტურებს, რომ მოლაპარაკებებში „დონბასის საკითხი საკვანძოა“.
ის ასევე ამბობს, რომ შეთანხმება, რომელიც აშშ-ის მიერ უსაფრთხოების გარანტიების მხარდაჭერას ითვალისწინებს, ხელმოსაწერად მზად არის, მისი გაფორმების დრო და ადგილი კი აშშ-ის პრეზიდენტ დონალდ ტრამპზეა დამოკიდებული.
ზელენსკიმ გასულ კვირას ისიც განაცხადა, რომ დავოსის მსოფლიო ეკონომიკური ფორუმის ფარგლებში ტრამპთან „პროდუქტიული და შინაარსიანი“ მოლაპარაკებები გამართა, თუმცა იქვე შენიშნა, რომ ტერიტორიული საკითხები კვლავ გადაუჭრელი დარჩა.
მისივე თქმით, უკრაინის ომისშემდგომი ეკონომიკური აღდგენის შესახებ შეთანხმებაც ასევე თითქმის მზად არის.
https://www.polskieradio.pl/395/9766/Artykul/3639567