ამერიკელმა მილიარდერმა, ილონ მასკმა განაცხადა, რომ „გაამართლა“ მისი კომპანია „სფეის იქსის“ მცდელობამ, რომელიც რუსეთის მიერ „სტარლინკის“ არასანქცირებული გამოყენების შეჩერებისკენ იყო მიმართული. თავის მხრივ, უკრაინის თავდაცვის მინისტრმა, მიხაილ ფედოროვმა უკრაინელი მომხმარებლებისთვის რეგისტრაციის შემოღების ვალდებულება დააანონსა, რომლის არქონის შემთხვევაში, ვერიფიცირების არმქონე ტერმინალები გაითიშება.
ამის შესახებ მასკმა სოციალურ ქსელ X-ზე დაწერა.
„როგორც ჩანს, ნაბიჯებმა, რომლებიც რუსეთის მიერ „სტარლინკის“ არასანქცირებული გამოყენების შესაჩერებლად გადავდგით, გაამართლა“, – დაპოსტა მასკმა.
ამ პოსტით ის უკრაინის თავდაცვის მინისტრის, მიხაილ ფედოროვის განცხადებას გამოეხმაურა, რომელმაც ცოტა ხნის წინ მადლობა გადაუხადა „სფეის იქსის“ პრეზიდენტ გვენ შოტველს და თავად მასკს სწრაფი რეაგირებისთვის ინფორმაციაზე, რომლის მიხედვითაც, რუსეთი უკრაინის ქალაქებზე თავდასხმისას, „სტარლინკით“ აღჭურვილ დრონებს იყენებს.
მილიარდერმა ასევე მოუწოდა ფედოროვს, შეატყობინოს, თუ დამატებითი ზომების მიღება გახდება საჭირო. თავის მხრივ, უკრაინის თავდაცვის უწყების ხელმძღვანელმა დაადასტურა, რომ მიღებულ ზომებს „უკვე მოაქვს რეალური შედეგები“.
„პირველ ნაბიჯებს უკვე მოაქვს რეალური შედეგები. ჩვენ მჭიდროდ ვთანამშრომლობთ თქვენს გუნდთან შემდგომში მისაღებ მნიშვნელოვან ზომებზე. გმადლობთ, რომ ჩვენთან ხართ. თქვენ თავისუფლების ნამდვილი ქომაგი და უკრაინელი ხალხის ნამდვილი მეგობარი ბრძანდებით“, – დაწერა ფედოროვმა.
მოგვიანებით, ფედოროვმა დააანონსა სისტემის ამოქმედების ახალი წესი, რომელიც უკრაინაში მხოლოდ ავტორიზებული ტერმინალების მუშაობას დაუშვებს.
მისი თქმით, უახლოეს დღეებში თავდაცვის სამინისტრო გამოაქვეყნებს ინსტრუქციებს უკრაინელი მომხმარებლებისთვის, თუ როგორ უნდა გაიარონ რეგისტრაცია და მოახერხონ „სტარლინკის“ ვერიფიცირება, რომლის გარეშეც ტერმინალები გაითიშება.
„რეგისტრაციის პროცესი მომხმარებლებისთვის მარტივი, სწრაფი და მოსახერხებელი იქნება. დეტალურ ინსტრუქციებს უახლოეს მომავალში გამოვაქვეყნებთ. მადლობას ვუხდით „სტარლინკსა“ და „სფეის იქსს“ თანამშრომლობისა და უკრაინელების მხარდაჭერაში პროაქტიული პოზიციისთვის“, – აღნიშნა უკრაინის თავდაცვის მინისტრმა.
29 იანვარს ცნობილი გახდა, რომ უკრაინის თავდაცვის სამინისტრო, ამერიკულ კომპანია „სფეის იქსთან“ ერთად, რუსულ დრონებზე „სტარლინკის“სატელიტური კავშირის გამოყენების პრობლემას აგვარებდა.
მანამდე, 27 იანვარს, უკრაინის თავდაცვის მინისტრმა, მიხაილ ფედოროვმა დაადასტურა, რომ რუსებმა დრონები „სტარლინკის“ სატელიტური სისტემებით აღჭურვეს. 26 იანვარს კი, უკრაინის თავდაცვის მინისტრის მრჩეველმა, სერგეი „ფლეშ“ ბესკრესტნოვმა განაცხადა, რომ რუსული БМ-35 ტიპის მოიერიშე დრონები, „სტარლინკით“ სარგებლობის შემთხვევაში, უკვე დნიპრომდე აღწევენ. მისივე თქმით, „მოლნიას“ ტიპის უპილოტო საფრენი აპარატებისგან განსხვავებით, ამ ტიპის დრონი „საწვავზე მუშაობს“ და 500 კმ-მდე მანძილზე ფრენის რესურსი გააჩნია.
როგორ იყენებს რუსეთი „სტარლინკს“ უკრაინის წინააღმდეგ ომში
2024 წლის 10 თებერვალს, მედია იუწყებოდა, რომ რუსული ჯარები უკრაინაში, სავარაუდოდ, „სფეის იქსისა“ და „სტარლინკის“ საკომუნიკაციო სისტემებს იყენებდნენ, რაც იმაზე მიუთითებდა, რომ ილონ მასკის კომპანია, სავარაუდოდ, რუსებს ეხმარებოდა.
11 თებერვალს, უკრაინის დაზვერვამ ფრონტზე რუსი ოკუპანტების მიერ „სტარლინკის“გამოყენების შესახებ ინფორმაცია დაადასტურა.
„სფეის იქსის“ მფლობელმა, ამერიკელმა მილიარდერმა ილონ მასკმა განაცხადა, რომ „სფეის იქსს“ რუსეთისთვის, პირდაპირ ან ირიბად, „სტარლინკის“ სატელიტური კავშირის სისტემები არ მიუყიდია.
„2024 წლის 25 სექტემბერს, რუსული თავდასხმის დროს, უკრაინის თავდაცვის ძალებმა ჩამოაგდეს რუსული დრონი, რომელიც „სტარლინკის“ სატელიტური კავშირით იყო აღჭურვილი“, – წერდა გამოცემა Defense Express-ი.
2026 წლის 24 იანვარს, რუსმა სამხედროებმა, კროპივნიცკის მახლობლად, დრონებით ვერტმფრენებზე მიიტანეს იერიში. ეს იყო პირველი შემთხვევა, როცა რუსეთმა „სტარლინკით“ მართვადი „შაჰედები“ გამოიყენა.
https://suspilne.media/1228673-kroki-aki-mi-vzili-spracuvali-mask-zaaviv-so-spacex-zupinila-nesankcionovane-vikoristanna-starlink-rf/