გასულ უქმეებზე ლიეტუვაში დაფიქსირებულმა ექსტრემალურმა ყინვამ, ქვეყნის მასშტაბით, 30-მდე ადამიანი დააზარალა. სამი ადამიანის სიკვდილიც, სავარაუდოდ, დაბალი ტემპერატურით არის გამოწვეული. ამის შესახებ ორშაბათს, 2 თებერვალს, ლიეტუვის სასწრაფო სამედიცინო დახმარების სამსახურის წარმომადგენლებმა განაცხადეს.
„უქმეებზე გარდაცვალების სამი შემთხვევა დაფიქსირდა: ერთი ტელშიაის რაიონში, ერთი ანიკშჩიაიში და ერთიც ვილნიუსში“, – აღნიშნა საინფორმაციო სააგენტო „ბალტიკ ნიუს სერვისთან“ (BNS) საუბრისას, ეროვნული სასწრაფო სამედიცინო დახმარების სამსახურის პრეს-სპიკერმა, ტომას ბაგდონასმა.
მისივე თქმით, სიცივისგან, მთელი ქვეყნის მასშტაბით, „დაახლოებით სამი ათეული ადამიანი დაშავდა“.
ტელშიაის რაიონში მამაკაცის ცხედარი კვირას, გამთენიისას, გარეთ იპოვეს. მას მხოლოდ მოკლესახელოებიანი პერანგი და შარვალი ეცვა; მედიკოსებმა მისი გარდაცვალება ადგილზევე დაადასტურეს.
ხელისუფლებამ ასევე გაავრცელა ინფორმაცია ანიკშჩიაის რაიონში გაყინული მამაკაცის, ხოლო თრაკაის რაიონში – ქალის ცხედრის პოვნის შესახებ.
შიაულიაის, პანევეჟისისა და კლაიპედის რეგიონებში მოყინვისა თუ ჰიპოთერმიის გამო ნამკურნალები ადამიანების ზუსტი რაოდენობა ჯერჯერობით უცნობია, თუმცა ოფიციალური პირების თქმით, შემთხვევების რაოდენობა რამდენიმე ათეულს აღწევს. ვილნიუსის ოლქში სიცივესთან დაკავშირებული 5 შემთხვევა დაფიქსირდა, ხოლო კაუნასის ოლქში – 16.
„ყველა შემთხვევა, რომელიც კონკრეტულად ჰიპოთერმიის გამო აღირიცხა, მოყინვით არის გამოწვეული“, – აღნიშნა ბაგდონასმა. მან ასევე დასძინა, რომ დაზარალებულთა უმეტესობას ხანდაზმულები, არაფხიზელ მდგომარეობაში მყოფი პირები და უსახლკაროები შეადგენენ.
ორშაბათს დილით, ლიეტუვაში, ბოლო 30 წლის განმავლობაში ყველაზე დაბალი ტემპერატურა დაფიქსირდა, ბევრ რაიონში კი ძლიერი ყინვაა.
ექსტრემალური სიცივის გამო, ორშაბათსა და სამშაბათს ზოგიერთი სკოლა დისტანციურ სწავლებაზე გადავიდა. ოფიციალური პირების ინფორმაციით, შეფერხებით მუშაობს საზოგადოებრივი ტრანსპორტი ვილნიუსში, კლაიპედასა და შიაულიაიში, ასევე მოსალოდნელია მატარებლების დაგვიანება.
https://www.lrt.lt/en/news-in-english/19/2825302/at-least-three-people-killed-by-extreme-cold-over-weekend-in-lithuania