გაზეთი „ვაშინგტონ პოსტი“ საინფორმაციო სამსახურიდან და სხვა განყოფილებებიდან თანამშრომლების მესამედს ათავისუფლებს, რაც მსოფლიო ჟურნალისტიკის ერთ-ერთი ლეგენდისთვის მძიმე დარტყმაა.
მედიასაშუალებამ მასშტაბური შემცირებები ოთხშაბათს დაიწყო, რაც სპორტული განყოფილების, რამდენიმე უცხოური ბიუროსა და სხვა მიმართულებების დახურვაში გამოიხატა. ცვლილებების შესახებ თანამშრომლებს გაზეთის მთავარმა რედაქტორმა, მეთ მიურეიმ ონლაინ-შეხვედრის დროს აცნობა.
„ასოშიეითიდ პრესის“ შეფასებით, ეს მძიმე დარტყმაა როგორც ზოგადად ჟურნალისტიკისთვის, ისე უშუალოდ გაზეთისთვის, რომელიც წარსულში უოთერგეიტის სკანდალის გამოაშკარავებით, ბოლო პერიოდში კი პრეზიდენტ დონალდ ტრამპის მიერ ფედერალური თანამშრომლების დათხოვნის ფაქტების მწვავე გაშუქებით არის ცნობილი.
რედაქციის თანამშრომლებს აცნობეს, რომ ელექტრონული ფოსტით მიიღებენ შეტყობინებას იმის თაობაზე, გაუქმდა თუ არა მათი შტატი. გაზეთის წარმომადგენელმა დაადასტურა, რომ პერსონალის მესამედი სამსახურს ტოვებს, თუმცა არ დაუკონკრეტებია, სულ რამდენი ადამიანია დასაქმებული „ვაშინგტონ პოსტში“.
მიურეიმ თანამშრომლებს განუცხადა, რომ გაუქმდება ბუღალტერია, ხოლო რეგიონული ახალი ამბების განყოფილება და სარედაქციო შტატი რეორგანიზაციას დაექვემდებარება. ასევე, შეწყდება პოდკასტ Post-Reports-ის გამოშვება.
მიურეიმ აღიარა, რომ შემცირებები სისტემისთვის შოკისმომგვრელი იქნება, თუმცა აღნიშნა, რომ ამ ნაბიჯის მიზანი „ვაშინგტონ პოსტის“ ზრდისა და განვითარების შესაძლებლობის დაბრუნებაა.
„დღეს „ვაშინგტონ პოსტი“ საკუთარი ნათელი მომავლისკენ რთულ, მაგრამ გადამწყვეტ ნაბიჯებს დგამს, რაც მთელი კომპანიის მნიშვნელოვან რესტრუქტურიზაციას გულისხმობს. ეს ცვლილებები მიზნად ისახავს ჩვენი პოზიციების გაძლიერებას და ფოკუსირებას იმ ჟურნალისტიკაზე, რომელიც „ვაშინგტონ პოსტს“ სხვებისგან გამოარჩევს და მკითხველის მოლოდინს პასუხობს“, – განაცხადა გამოცემის წარმომადგენელმა.
ვინაიდან გაზეთი კერძო კომპანიაა, ის ხელმომწერთა ზუსტ რაოდენობას არ ასაჯაროებს, თუმცა ვარაუდობენ, რომ ეს რიცხვი 2 მილიონს შეადგენს. ამ რადიკალურ ნაბიჯს უკვე რამდენიმე კვირაა ელოდნენ, კერძოდ კი მას შემდეგ, რაც გავრცელდა ინფორმაცია, რომ ზამთრის ოლიმპიადაზე წამსვლელ სპორტულ ჟურნალისტებს გაზეთმა იტალიაში გამგზავრება აუკრძალა. საზოგადოების მწვავე რეაქციის შემდეგ, „ვაშინგტონ პოსტმა“ გადაწყვეტილება შეცვალა და განაცხადა, რომ ოლიმპიურ თამაშებზე თანამშრომლების მხოლოდ შეზღუდულ რაოდენობას გაგზავნიდა.
გაზეთის პრობლემები საკმაოდ კონტრასტულია მის მრავალწლიან კონკურენტ „ნიუ იორკ თაიმსთან“ შედარებით, რომელმაც ბოლო წლებში დიდ წარმატებას მიაღწია, რაც მნიშვნელოვანწილად განაპირობა ინვესტიციებს ჩადებამ ისეთ არაპროფილურ პროდუქტებში, როგორიცაა სათამაშო პლატფორმა და პროდუქტების სარეკომენდაციო საიტი.
„ნიუ იორკ თაიმსმა“, ბოლო ათწლეულის განმავლობაში, თანამშრომლების რაოდენობა გააორმაგა.
გაზეთი რომ ხელმომწერებს კარგავს, ნაწილობრივ მის მიერ მიღებულ გადაწყვეტილებებს უკავშირდება, მათ შორის – 2024 წლის საპრეზიდენტო არჩევნებზე ტრამპის წინააღმდეგ კამალა ჰარისის მხარდაჭერაზე უარის თქმას. გარდა ამისა, გამოცემამ ტრადიციულად ლიბერალური სარედაქციო სვეტები უფრო კონსერვატიული მიმართულებით შეცვალა.
„ვაშინგტონ პოსტის“ თანამშრომელთა პროფკავშირმა მკითხველებს მოუწოდა, გაეგზავნათ გზავნილი ბეზოსისთვის: „საკმარისია! „ვაშინგტონ პოსტის“ თანამშრომელთა გარეშე „ვაშინგტონ პოსტი“ არ იარსებებს“.
https://bntnews.bg/news/vestnik-vashington-post-sakrashtava-edna-treta-ot-personala-si-1377585news.html