სლოვაკეთის რესპუბლიკაში სამუშაო ვიზიტის ფარგლებში, საქართველოს კულტურის მინისტრი თინათინ რუხაძე სლოვაკეთის კულტურის მინისტრ მარტინა შიმკოვიჩოვას შეხვდა.
მხარეებმა საქართველოსა და სლოვაკეთის რესპუბლიკებს შორის ურთიერთობების გაღრმავების შესაძლებლობები განიხილეს და ორ ქვეყანას შორის თანამშრომლობის მემორანდუმის გაფორმების პერსპექტივაზე იმსჯელეს. ყურადღება დაეთმო თეატრის, კინოს, ფოლკლორისა და სამუზეუმო მიმართულებებს.
ასევე, განიხილეს საქართველოსა და სლოვაკეთის კულტურის დღეების გამართვის საკითხი, რაც ორ ქვეყანას შორის კულტურული კავშირების გაძლიერებას შეუწყობს ხელს. შეხვედრაზე ისაუბრეს ორმხრივი ახალგაზრდული პროექტების განხორციელების შესაძლებლობებზე.
თინათინ რუხაძემ სლოვაკ მასპინძლებს, საქართველოს სახელით, ქალაქ ტრენჩინის ევროპის კულტურის დედაქალაქად გამოცხადება მიულოცა. თავის მხრივ, სლოვაკეთის რესპუბლიკის კულტურის მინისტრმა საქართველოსთან კულტურის სფეროში მრავალმხრივი თანამშრომლობის გაღრმავების მზაობა გამოხატა.
“გვქონდა ნაყოფიერი შეხვედრა. განვიხილეთ საინტერესო პროექტები, რომლებიც საქართველოსა და სლოვაკეთის ურთიერთობების გაღრმავებას შეუწყობს ხელს. ვფიქრობთ, მოვამზადოთ მემორანდუმი, რომელიც კულტურის სხვადასხვა დარგში თანამშრომლობის გაძლიერებას მოემსახურება. ორივე მხარემ გამოვთქვით მზადყოფნა გაცვლითი პროექტების განსახორციელებლად”, – განაცხადა შეხვედრის შემდეგ თინათინ რუხაძემ.
შეხვედრას ესწრებოდნენ: საქართველოს კულტურის სამინისტროს საერთაშორისო ურთიერთობების დეპარტამენტის უფროსი ზურაბ ბაკურაძე, საქართველოს საგანგებო და სრულუფლებიანი ელჩი სლოვაკეთის რესპუბლიკაში კონსტანტინე ქვაჩაკიძე, სლოვაკეთის კულტურის მინისტრის ოფისის გენერალური დირექტორი იანა დემკოვა, სლოვაკეთის კულტურის სამინისტროს წარმომადგენლები, სლოვაკეთის ეროვნული გალერეის გენერალური დირექტორი იურაი კრალიკი.
ინფორმაციას კულტურის სამინისტრო ავრცელებს.