ჩვენთან არიან პოლიტიკური ჯგუფები, რომელთა მთავარი ამოცანაა არა ის, რომ ვიმსჯელოთ როგორ უკეთესად გაკეთდეს, არამედ ის, რომ გაკეთებულს შეეწინააღმდეგონ, – განაცხადა გადაცემაში „იმედის კვირა“ „ბიზნეს ინსაიდერ საქართველოს“ დამფუძნებელმა გიორგი აბაშიშვილმა „არაბიზაციის“ ჩავარდნილ კამპანიაზე საუბრისას.
მისი თქმით, საქართველოში არ არსებობენ თემატურად მომუშავე ჯგუფები არც ოპოზიციიდან და არც ექსპერტული წრიდან.
„ფაქტია, რომ საქართველოში ჩვენ არ გვყავს თემატურად მომუშავე ჯგუფები, არც ე.წ ოპოზიციიდან, არც ე.წ ექსპერტებიდან. ჩვენთან არიან პოლიტიკური ჯგუფები, რომელთა მთავარი ამოცანაა არა ის, რომ ვიმსჯელოთ როგორ უკეთესად გაკეთდეს, არამედ ის, რომ გაკეთებულს შეეწინააღმდეგონ. ფაქტი ერთია, ქვეყანა ვითარდება, ჩვენ ვხედავთ მაღალ ეკონომიკურ ზრდას, მაღალი რეპუტაციული ინვესტორების შემოსვლას საქართველოში. კიდევ ერთი მნიშვნელოვანი ფაქტი – ყველა ავტორიტეტული საერთაშორისო საფინანსო ინსტიტუტი აღნიშნავს ამ ქვეყნის წარმატებას. საერთაშორისო საფინანსო ინსტიტუტები როცა აღნიშნავენ ქვეყნის წარმატებას და ქვეყანაში მყოფი ჯგუფები ამბობენ, რომ ეს ასე არ არის, დიაგნოზია, რა კატეგორიის ადამიანებთან გვიწევს საუბარი“, – განაცხადა აბაშიშვილმა.
მისი თქმით, „არაბიზაციის“ მითი „იგლ ჰილსის“ გაყიდვების სტატისტიკამ მარტივად დაამსხვრია.
„ბრალდება იყო სრული აბსურდი, რომ თითქოს წინასწარ დაგეგმილი იყო გარკვეული კატეგორიის ადამიანების შემოსვლა საქართველოში. მარტივად დადასტურდა ეს ტყუილი, 24 საათში გაყიდვების სტატისტიკით“, – აღნიშნა გიორგი აბაშიშვილმა.