„მსოფლიო უკვე ყოფილა ასეთ სიტუაციაში – 23 წლის წინ, აშშ-ის სხვა ადმინისტრაციამ უსამართლო ომში ჩაგვითრია“, – განაცხადა 4 მარტს ესპანეთის პრემიერ-მინისტრმა, პედრო სანჩესმა, ერაყში აშშ-ის შეჭრის თემაზე საუბრისას.
„ესპანეთის მთავრობის პოზიცია ნათელია: „არა“-ს ვეუბნებით იმ აზრს, რომ მსოფლიოს თავისი პრობლემების მოგვარება მხოლოდ ბომბებით შეუძლია“ – 4 მარტს ესპანეთის პრემიერ-მინისტრი, პედრო სანჩესი ირანის წინააღმდეგ ისრაელ-ამერიკის სამხედრო კამპანიას კიდევ ერთხელ დაუპირისპირდა და ამავდროულად, დონალდ ტრამპის კრიტიკას უპასუხა. წინა დღეს კი, სამშაბათს, ამერიკის პრეზიდენტი მადრიდს „ყველა სახის სავაჭრო ურთიერთობის შეწყვეტით“ დაემუქრა და გააკრიტიკა მისი უარი, შეერთებული შტატებისთვის ანდალუსიაში მდებარე ორი ამერიკული ბაზის გამოყენების უფლება მიეცა იმ შეთანხმების ფარგლებში, რომელიც 1953 წელს, ფრანკოს დიქტატურის დროს გაფორმდა.
„შურისძიების შიშის გამო, ჩვენ არ ვიქნებით ისეთი რამის თანამზრახველები, რაც ცუდია მსოფლიოსთვის და ამავე დროს, ჩვენს ღირებულებებსა და ინტერესებსაც ეწინააღმდეგება“, – განაცხადა პედრო სანჩესმა. ესპანეთის პრემიერ-მინისტრი „საბრძოლო მოქმედებების შეწყვეტის“ მოწოდებით გამოვიდა და „დიპლომატიური გზით პრობლემის დარეგულირების“ იმედი გამოთქვა.
უარი თავდაცვის ბიუჯეტის გაზრდაზე
დევიზით – „არა ომს“, რაც 2003 წელს აშშ-ის მიერ დაწყებული ერაყის ომის წინააღმდეგ ესპანელი მემარცხენეების ლოზუნგზე მინიშნებაა, ოფიციალური მადრიდი ღიად უპირისპირდება როგორც ამერიკას, ისევე ისრაელს. „მსოფლიო უკვე ყოფილა ასეთ სიტუაციაში. 23 წლის წინ აშშ-ის სხვა ადმინისტრაციამ უსამართლო ომში ჩაგვითრია. ერაყის ომმა ტერორიზმის მკვეთრი ზრდა და სერიოზული მიგრაციული და ეკონომიკური კრიზისი გამოიწვია“, – აღნიშნა პედრო სანჩესმა.
დონალდ ტრამპსა და პირინეის ნახევარკუნძულზე მდებარე სახელმწიფოს შორის დაძაბულობა ახალი ამბავი არ არის. უკვე რამდენიმე თვეა, თეთრი სახლი მადრიდს იმის გამო კრიტიკებს, რომ მან სამხედრო ხარჯები მთლიანი შიდა პროდუქტის (მშპ) 5%-მდე არ გაზარდა. ამას ვაშინგტონის კარნახით ნატო-ს მიერ მხარდაჭერილი ახალი მიზანი მოითხოვს, რომელიც 2025 წლის ივნისიდან შევიდა ძალაში.
ოქტომბერში აშშ-ის პრეზიდენტმა განაცხადა, რომ ესპანეთი ჩრდილო-ატლანტიკური ალიანსიდან „გარიცხვას“ იმსახურებს, ახლა კი ტრამპი „ესპანეთის სავაჭრო ტარიფებით დასჯით“ იმუქრება. მადრიდი მიიჩნევს, რომ მას ნატო-ს მიერ დასახული ამოცანების შესრულება იმ შემთხვევაშიც შეუძლია, თუ თავის სამხედრო ხარჯებს მშპ-ის მხოლოდ 2%-მდე გაზრდის.
ღაზაში ისრაელის შეტევის დიდი ხნის კრიტიკოსი
მადრიდი, რომელმაც 2024 წელს პალესტინის სახელმწიფოებრიობა აღიარა, ღაზას სექტორში ისრაელის სამხედრო იერიშის ერთ-ერთი ყველაზე ხმამაღალი კრიტიკოსია ევროპაში. „ირანთან დაკავშირებით ესპანეთის მთავრობის პოზიცია იგივეა, რომელიც ჩვენ უკრაინისა და ღაზის მიმართ გვეკავა – არა საერთაშორისო სამართლის კოლაფსს, რომელიც თითოეულ ჩვენგანს, განსაკუთრებით კი მშვიდობიან მოსახლეობას იცავს“, – ხაზგასმით აღნიშნა პედრო სანჩესმა ოთხშაბათს.
დეკემბერში, პალესტინის ეროვნული ადმინისტრაციის პრეზიდენტ მაჰმუდ აბასთან მადრიდში შეხვედრისას, ესპანეთის პრემიერმა კიდევ ერთხელ მოუწოდა საერთაშორისო საზოგადოებას, პალესტინელების „დრამატული მდგომარეობის“ გამო „ხმა აიმაღლონ“ და „ორი სახელმწიფოს“ – ისრაელისა და პალესტინის -არსებობის პრინციპის საფუძველზე პრობლემის გადაწყვეტას დაუჭირონ მხარი. „ამ გენოციდის მომწყობი პირები, ადრე თუ გვიან, პასუხისგებაში მიეცემიან, რათა მსხვერპლმა შეძლოს სამართლიანობის მიღწევა, რეპარაციის მიღება და სიმშვიდის პოვნა“, – მტკიცედ აღნიშნა მან.
https://www.franceinfo.fr/monde/iran/guerre-entre-les-etats-unis-israel-et-l-iran/nous-ne-serons-pas-complices-l-espagne-refuse-d-aider-les-etats-unis-dans-sa-guerre-contre-l-iran_7844687.html