ახალციხეში დაკავებულ ირანის მოქალაქესთან დაკავშირებით მთავარი პროკურატურა განმარტებას აკეთებს და აცხადებს, რომ მასთან საპროცესო შეთანხმება არ გაფორმდება. მამაკაცს ბრალდების მხარე პატიმრობაში მყოფ მამაკაც არასრულწლოვანი ბიჭების მიმართ სქესობრივ კავშირს ან სექსუალური ხასიათის სხვაგვარ მოქმედებას ედავება და გავრცელდა ინფორმაცია, თითქოს მისი გათავისუფლება საპროცესო გარიგების საფუძველზე იგეგმება.
„ახალციხის რაიონულ სასამართლოში მიმდინარეობს საქმის არსებითი განხილვა ირანის ისლამური რესპუბლიკის მოქალაქის ჰ. ფ. ქ. – ს მიმართ, რომელსაც ბრალი ედება საქ. სსკ-ის 18-140-ე მუხლით (ხუთი ეპიზოდი) გათვალისწინებული დანაშაულის ჩადენაში.
ბრალდებული იმყოფება პატიმრობაში. ბრალდებულმა ჰ. ფ. ქ.-მ სამცხე-ჯავახეთის საოლქო პროკურატურას განცხადებით მომართა და ითხოვა საპროცესო შეთანხმების გაფორმება მისი ბრალდების საქმეზე, რაც გახლავთ ბრალდებულის უფლება. საქართველოს მთავარი პროკურატურა ცალსახად აცხადებს, რომ ბრალდებულს საპროცესო შეთანხმება არ გაუფორმდება, ვინაიდან მსგავსი კატეგორიის საქმეებზე საქართველოს პროკურატურას მკაცრი სისხლის სამართლის პოლიტიკა აქვს“, – განუცხადეს საზ. მაუწყებელს მთავარი პრკურატურის პრესსამსახურში.