19 მარტს გამოქვეყნებულმა ახალმა გამოკითხვამ აჩვენა, რომ ხუთიდან ოთხი პოლონელი გლობალური უსაფრთხოებისთვის ყველაზე დიდ საფრთხედ რუსეთს, ისრაელსა და შეერთებულ შტატებს მიიჩნევს. გამოკითხვამ ამ საკითხში თაობებს შორის არსებული მკვეთრი დაყოფაც წარმოაჩინა.
კითხვაზე, რომელი ქვეყნები უქმნიან ყველაზე დიდ საფრთხეს მსოფლიო უსაფრთხობას, გამოკითხულთა 54-მა პროცენტმა ასეთ სახელმწიფოდ რუსეთი დაასახელა, 15-მა პროცენტმა – ისრაელი, ხოლო 14-მა პროცენტმა – შეერთებული შტატები.
ყოველდღიური გამოცემა Dziennik Gazeta Prawna-ს დაკვეთით, საზოგადოებრივი აზრის შემსწავლელი ორგანიზაცია CBOS-ის მიერ ჩატარებული გამოკითხვის შედეგების თანახმად, ჩინეთი და ირანი ამ სამეულს საგრძნობლად ჩამორჩებიან (შესაბამისად, 3,6 და 2,1 პროცენტი).
ასაკოვან რესპონდენტებს ყველაზე მეტად კვლავ მოსკოვი აშფოთებთ: 65 წელს გადაცილებულთა 73-მა პროცენტმა ყველაზე დიდ საფრთხედ რუსეთი დაასახელა, მაშინ როცა 25-34 წლის ასაკობრივ ჯგუფში კრემლს მხოლოდ 36 პროცენტი უფრთხის.
ვაშინგტონის შემთხვევაში აღქმა საპირისპიროა: 18-24 წლის ახალგაზრდების 24 პროცენტი და 25-34 წლის ასაკობრივი ჯგუფის 25 პროცენტი მთავარ საფრთხედ შეერთებულ შტატებს ასახელებს, განსხვავებით ხანდაზმულებისგან, რომელთა შორისაც ასეთი განწყობა 10 პროცენტზე ნაკლებია.
„ამჟამად ისრაელს საფრთხედ, ძირითადად, ახალგაზრდები აღიქვამენ“, – აღნიშნავს გაზეთი და მოჰყავს მონაცემები, რომელთა მიხედვითაც, ამ მოსაზრებას 35 წლამდე ასაკის გამოკითხულთა 27 პროცენტი იზიარებს, ხოლო 55 წელს გადაცილებულებში ეს მაჩვენებელი 10 პროცენტზე ნაკლებია.
გარკვეული მნიშვნელობა აქვს პოლიტიკურ შეხედულებებსაც. რუსეთის შესახებ შეხედულებები, ხშირად, პარტიულ თანხვედრაშია, თუმცა მემარცხენე ამომრჩევლების 26-მა პროცენტმა და ცენტრისტების 18-მა პროცენტმა მთავარ საფრთხედ შეერთებული შტატები დაასახელა, მაშინ როცა მემარჯვენეებში ეს მაჩვენებელი მხოლოდ 6 პროცენტია.
ისრაელი საშიშ სახელმწიფოდ მიიჩნია მემარჯვენეების 27,5-მა პროცენტმა. შედარებისთვის: მემარცხენეებში ეს მაჩვენებელი 9 პროცენტია, ხოლო ცენტრისტებში – 6 პროცენტი.
წყარო: პოლონეთის სახელმწიფო საინფორმაციო სააგენტო PAP (Polska Agencja Prasowa)