ევროკომისიის პრეზიდენტის ურსულა ფონ დერ ლაიენის განცხადებით, ირანთან მოლაპარაკებისა და საომარი მოქმედებების შეწყვეტის დრო დადგა.
ფონ დერ ლაიენმა გააკრიტიკა ირანის შეტევები სამოქალაქო ინფრასტრუქტურაზე და ჰორმუზის სრუტის ნაწილობრივ დახურვა მიუღებლად შეაფასა.
„ირანმა დაუყოვნებლივ უნდა შეწყვიტოს მუქარა, ნაღმების განთავსება, უპილოტო საფრენი აპარატებითა და რაკეტებით შეტევები, ასევე სავაჭრო გადაზიდვებისთვის სრუტის გადაკეტვის სხვა მცდელობები“, – განაცხადა ურსულა ფონ დერ ლაიენმა.
ევროკომისიის პრეზიდენტმა ისაუბრა კონფლიქტის ენერგეტიკულ შედეგებზეც.
„მოლაპარაკებების მაგიდასთან დასხდომის და საომარი მოქმედებების დასრულების დროა. მდგომარეობა კრიტიკულია მსოფლიო ენერგომომარაგების თვალსაზრისით. ჩვენ, ყველანი ვგრძნობთ ბუნებრივი აირისა და ნავთობის ფასების ზრდის გავლენას ჩვენს ბიზნესსა და საზოგადოებაზე. უმნიშვნელოვანესია, რომ მოლაპარაკებით მივაღწიოთ გადაწყვეტილებას, რომელიც დაასრულებს საომარ მოქმედებებს ახლო აღმოსავლეთში“, – აღნიშნა ევროკომისიის პრეზიდენტმა.