ლატვიის სამხედრო დაზვერვისა და უსაფრთხოების სამსახურმა (MIDD), 2025 წლის საქმიანობის ანგარიშის ფარგლებში, რუსეთის შეიარაღებული ძალების გენერალური შტაბის მთავარი სამმართველოს (ГРУ) ექვსი ოფიცრისა და ბელარუსის ГРУ-ს ერთი ოფიცრის ვინაობა გაასაჯაროვა, რომლებიც, უწყების განცხადებით, ლატვიის წინააღმდეგ ჯაშუშურ საქმიანობას ეწეოდნენ.
„ევროპასა და ლატვიაში გრძელდება რუსეთის მიერ გაჩაღებული დივერსიული ოპერაციების კამპანია, რომლის მიზანია საზოგადოების დაშინება და უკრაინის მხარდაჭერასთან დაკავშირებული პოლიტიკური გადაწყვეტილებების მიღებაზე ზეგავლენის მოხდენა. რუსეთის სადაზვერვო და უსაფრთხოების სამსახურები დივერსანტების, ისევე როგორც ინფორმაციის შემგროვებლების გადაბირებას სულ უფრო ხშირად ახდენენ ონლაინ-კომუნიკაციის პლატფორმების საშუალებით“, – ნათქვამია MIDD-ის 2025 წლის საქმიანობის ანგარიშში.
MIDD-ის ცნობით, ოპერატიულ-ტაქტიკურ დონეზე რეგიონული ჯაშუშური ქსელების შექმნაზე პასუხისმგებლობა მოსკოვში, სანქტ-პეტერბურგში, კალინინგრადსა და სმოლენსკში განთავსებულ სადაზვერვო ცენტრებს აკისრიათ.
აღნიშნული სადაზვერვო ცენტრები განსაკუთრებით აქტიურად ცდილობენ იმ ლატვიელი მოქალაქეების გადაბირებას, რომლებიც რეგულარულად მგზავრობენ რუსეთსა და ბელარუსში.
MIDD-მა გამოავლინა რუსეთის ГРУ-ს რამდენიმე ოფიცერი და ბელარუსის ГРУ-ს ერთი ოფიცერი, რომლებიც ლატვიის წინააღმდეგ ჯაშუშობდნენ და მათი ვინაობა საჯარო გახადა.
რუსეთის სპეცსამსახურებიდან იდენტიფიცირებულნი არიან: მაიორი ალექსეი პიჟიკოვი, მე-2 რანგის კაპიტანი ალექსეი ლესნიკოვი, მე-2 რანგის კაპიტანი ნიკოლაი ჩეტვერიკოვი, ვიცე-პოლკოვნიკი ალექსანდრე იუშინი, პოლკოვნიკი ალექსანდრე გლადკოვი და გრიგორი ივანოვი, რომლის წოდებაც მითითებული არ არის.
ბელარუსის ГРУ-დან კი იდენტიფიცირებულია სერგეი ბარანოვი.
ასევე გამოქვეყნდა სავარაუდო ჯაშუშების ნაწილის ფოტოებიც.
MIDD-მა განსაკუთრებით გამოყო რუსეთის სამხედრო დაზვერვის ოფიცრის, 1989 წელს დაბადებული ივანოვის პერსონა, რომელიც ლატვიის წინააღმდეგ 2017 წლიდან საქმიანობს.
ივანოვს, სავარაუდოდ, მიეწერება კერძო საავიაციო ინფრასტრუქტურის (მაგალითად, სპილვეს აეროდრომის) გამოყენება ქვეყანაში განთავსებული ნატო-ს ძალებისა და ლატვიის თავდაცვის სექტორში მიმდინარე სხვადასხვა მოვლენის შესახებ სადაზვერვო ინფორმაციის მოპოვების მიზნით.
ლატვიაში მცხოვრები შორეული ნათესავისთვის დახმარების თხოვნის გზით, ივანოვმა ასევე მოიპოვა ინფორმაცია ლატვიის საზოგადოების განწყობის, უკრაინისთვის გაწეული დახმარებისა და ქვეყნის ტერიტორიაზე არსებული კრიტიკული ინფრასტრუქტურის ობიექტების შესახებ.
ივანოვმა თავისი საკონტაქტო პირისგან პრაქტიკული ინფორმაციაც მიიღო, მაგალითად, ლატვიაში წინასწარი გადახდის მობილური ბარათების შეძენის პირობების შესახებ – მიუხედავად იმისა, რომ ეს ინფორმაცია მაინცდამაინც გასაიდუმლოებული არ არის.
MIDD-მა აღნიშნა, რომ რუსეთის ინტერესების სასარგებლოდ სადაზვერვო მონაცემების შეგროვებას ბელარუსიც ახორციელებს და ამდენად, მისი სამხედრო დაზვერვა შეიძლება რუსეთის ГРУ-ს „ფილიალად“ ჩაითვალოს.
ლატვიის სპეცსამსახურები ასევე აღნიშნავენ, რომ რუსეთის ГРУ-ს იდენტიფიცირებული ოფიცრები, 2022 წლის თებერვლამდე, ლატვიაში არსებულ რუსეთის საელჩოში მსახურობდნენ და თავდაცვის ან სამხედრო ატაშეების თანამდებობებს შესანიღბად იყენებდნენ.
უკრაინაში რუსეთის სრულმასშტაბიანი შეჭრის დაწყებიდან მალევე, ГРУ-ს ყველა ოფიცერი, რომელიც იმ დროისთვის რუსეთის საელჩოში იყო გაფორმებული, ლატვიიდან გააძევეს.
საინტერესოა, რომ რუსეთის ან ბელარუსის ჯაშუშებად იდენტიფიცირებული პირების ვინაობა MIDD-ს დღემდე არასდროს გაუსაჯაროვებია. ამ უწყების ანალოგიურ ანგარიშში, რომელიც 2024 წელს ეხება, ძირითადად, შეიტანეს რჩევები იმის შესახებ, თუ როგორ უნდა მომხდარიყო პოტენციური ჯაშუშების ამოცნობა, თუმცა სახელები არ გასაჯაროვებულა და 2025 წლის ანგარიშთან შედარებით, საგრძნობლად მოკლე იყო.
MIDD-ი არის ლატვიის უსაფრთხოებისა და სადაზვერვო სამი სამსახურიდან ერთ-ერთი, კონსტიტუციის დაცვის ბიუროსა (SAB) და სახელმწიფო უსაფრთხოების სამსახურთან (VDD) ერთად.
მისი ბოლო ყოველწლიური მიმოხილვის სრული ვერსიის წაკითხვა შესაძლებელია აქ.