გერმანულ-რუსული სავაჭრო პალატა აცხადებს, რომ რუსეთი, ჰორმუზის სრუტის ბლოკადის გამო, საქონლის ექსპორტიდან მილიარდობით ევროს ოდენობის დამატებით შემოსავალს იღებს.
პალატის მონაცემებით, ნავთობის, გაზისა და სასუქების ექსპორტიდან რუსეთის ყოველთვიური მოგება ამჟამად 10 მილიარდ ევროს აჭარბებს. „რუსეთი ახლო აღმოსავლეთში გაჩაღებული ახალი ომის მთავარი გამარჯვებულია“, – განუცხადა პალატის პრეზიდენტმა, მატიას შეპმა გერმანულ სამაუწყებლო კომპანია „დოიჩე ველეს“.
რუსეთი მსოფლიოში სასაქონლო ფასების ზრდით სარგებლობს, რადგან ის სხვა საექსპორტო მარშრუტებს იყენებს. „ამ ვითარებამ შეიძლება რუსეთს ისტორიული მასშტაბის მოულოდნელი მოგება მოუტანოს“, – მიიჩნევს შეპი.
იმ პირობებში, როდესაც ნავთობის ფასი ბარელზე დაახლოებით 100 დოლარია, რუსეთს, თავდაპირველ გათვლასთან შედარებით, 71.8 მილიარდი დოლარით მეტი წლიური საბიუჯეტო შემოსავლის იმედი შეიძლება ჰქონდეს.
კვირის დასაწყისში, ივნისში მისაწოდებელი „ბრენტის“ მარკის ნედლი ნავთობის ღირებულებამ 111 დოლარს გადააჭარბა. ეს ფასი თითქმის 40 დოლარით მეტია, ომამდელთან შედარებით.
რუსეთის ბიუჯეტი დიდწილად არის დამოკიდებული ნავთობისა და გაზის გაყიდვებზე, მიმდინარე ბიუჯეტით გათვალისწინებული ფასი კი ბარელზე 59 დოლარია. ირანში ომის დაწყებამდე, რუსეთის ბიუჯეტი დეფიციტური იყო, რადგან ნავთობის ფასი პროგნოზირებულ ნიშნულზე უფრო დაბლა ჩამოვიდა.
„ფასების ამჟამინდელი დონის გათვალისწინებით, მოსკოვს მხოლოდ ნავთობისა და გაზისგან წელიწადში დაახლოებით 50 მილიარდი დოლარის დამატებითი შემოსავლის მიღება შეუძლია“, – აცხადებენ პალატაში.
რუსეთი, რომელიც ასევე იმედოვნებს, რომ დასავლური სანქციები გაუქმდება, საქონლის გაყიდვიდან მიღებულ შემოსავალს უკრაინის წინააღმდეგ ომის დასაფინანსებლად იყენებს.
მოსკოვში ვარაუდებენ, რომ ნავთობის ფასი 220 დოლარამდე გაიზრდება. პალატის ანგარიშით, ეს ქვეყანას 350.4 მილიარდი დოლარის ოდენობის შემოსავალს მოუტანს.