დავით როსტომაშვილზე თავდასხმის ბრალდებით დაკავებული ზურაბ ქუთელიას ადვოკატი ალექსანდრე კობაიძე „ნიუპოსტთან“ საუბრისას აცხადებს, რომ საქმეში არ არსებობს არცერთი ვიდეოჩანაწერი, რომელიც დაადასტურებს, რომ იუმორისტს თავს მისი დაცვის ქვეშ მყოფი პირი დაესხა.
ადვოკატის თქმით, შემთხვევისას დაკავებული საკუთარი ავტომობილით, გოგოსთან ერთად გადაადგილდებოდა, დაცვის მხარისთვის გაუგებარია იუმორისტი ხელს ახალგაზრდა მამაკაცს რატომ ადებს.
კობაიძის განცხადებით, რეალური დამნაშავეები იდენთიფიცირებულები არ არიან.
“ქუთელია მხოლოდ იმიტომ არის დაკავებული, რომ მიმდებარე ტერიტორიაზე გადაადგილდებოდა, ეს სათვალთვალო კამერებით გადაღებულ მასალაშიც ჩანს. ამასთან საქმეში დევს იმ მოწმის ჩვენება, რომლის მანქანითაც სავარაუდო დამნაშავეები როსტომაშვილზე თავდასასხმელად მივიდნენ. ეს ადამიანი ამბობს, რომ ქუთელია მის მანქანაში არ მჯდარა”- აღნიშნავს დაკავებულის ადვოკატი.
კობაიძე „ნიუპოსტთან“ საუბრისას აცხადებს, რომ პროცესი შეგნებულად იწელება, რადგან ნამდვილი დამნაშავეები ამ დრომდე დაკავებულები არ არიან.
მისი თქმით, პროკურატურას მოუწევს ქუთელია გაათავისუფლოს, რის შემდეგაც როსტომაშვილის პასუხისმგებლობის საკითხი უნდა დადგეს.
„თუ დამტკიცდება, რომ აღნიშნულ საქმეზე ქუთელია უდანაშაულოა და გამოძიება შეწყდება, აბსოლუტურად ლეგიტიმურად ცრუ ჩვენების მიცემისთვის, როსტომაშვილი სისხლის სამართლის პასუხისმგებლობაში მიეცეს“- განაცხადა ადვოკატმა.
ქუთელიას დედა მარინა მიქაძე ,,ნიუპოსტთან“ აცხადებს, მისი შვილი შიმშილობის დაწყებას აპირებს ოჯახი კი აქციებს გამართავს.
„კამერებში ჩანს, რომ ჩემ შვილი როსტომაშვილის ცემაში არ მონაწილეობდა. ზურა, მეგობარ გოგონასთან ერთად საკუთარი მანქანით გადაადგილდებოდა. ექსპერტიზაზე ყველაფერი გადაგზავნილია, იმედი მაქვს სიმართლე გაირკვევა და ჩემს შვილს გამოუშვებენ, წინააღმდეგ შემთხვევაში აქციებს გავმართავთ, თვითონ ზურა შიმშილობას აპირებს და მეც შევუერთდები. ეს კადრები ვნახე, ვიზუალურად რომ ჩემი შვილის ტანი არ არის, ამაში დარწმუნებული ვარ. ზურა იქ არ ყოფილა, რეალური დამნაშავეები დაკავებულები არ არიან. წარმოიდგინეთ, რომ ეს ჩაიდინა და სახლში ელოდებოდა პოლიცია როდის წაიყვანდა. არანაირ ჯაჭვში ეს არ ჯდება“ – აცხადებს მარინა მიქაძე.
იუმორისტ დავით როსტომაშვილს თავს 14 ივნისს დაესხნენ. გავრცელდა ინფორმაცია, რომ ის ბეისბოლის ჯოხით სცემეს. შემთხვევა ყოფილი 5 დეკემბრის ქუჩაზე საქმეზე პოლიციამ ერთი პირი დააკავა. მეორეზე კი ძებნაა გამოცხადებული, რომელიც პოლიციას განყოფილებიდან გაექცა.
www.newposts.ge