ბრაზილია: დაზვერვის სამსახურის ყოფილი ხელმძღვანელი აშშ-ში საიმიგრაციო და საბაჟო სამსახურმა დააკავა

ბრაზილიის ფედერალური პოლიციის ცნობით, „უზენაესი სასამართლოს მიერ მსჯავრდებული ბრაზილიელი მამაკაცი ორლანდოში (ფლორიდის შტატი) აშშ-ის საიმიგრაციო და საბაჟო სამსახურმა (ICE) დააკავა“.

ფედერალურმა პოლიციამ რამდენიმე ადგილობრივ მედია-საშუალებას დაუდასტურა, რომ საქმე ეხება ალექსანდრე რამაგემს, რომელსაც გასული წლის სექტემბერში, სახელმწიფო გადატრიალების მცდელობისთვის, 16 წლით პატიმრობა მიესაჯა.

აშშ-ის საიმიგრაციო და საბაჟო სამსახურის ვებ-გვერდზე კი მხოლოდ ის არის აღნიშნული, რომ ბრაზილიის მოქალაქე „ICE-ს ზედამხედველობის ქვეშ იმყოფება“ და მისი დაკავება „ფედერალურ პოლიციასა და აშშ-ის სამართალდამცავ ორგანოებს შორის საერთაშორისო საპოლიციო თანამშრომლობის შედეგია“.

ალექსანდრე რამაგემი „ბრაზილიის ხელისუფლების მიერ ძებნილად“ მას შემდეგ იყო გამოცხადებული, რაც ის დამნაშავედ ცნეს „შეიარაღებულ კრიმინალურ დაჯგუფებაში მონაწილეობაში, სახელმწიფო გადატრიალების მცდელობასა და კანონის უზენაესობის ძალადობრივი გზით გაუქმების მცდელობაში“.

ყოფილ მაღალჩინოსანს 16-წლიანი პატიმრობა 2025 წლის 11 სექტემბერს მიესაჯა. ამავე სასამართლო პროცესზე 27 წლით თავისუფლების აღკვეთა მიესაჯა ბრაზილიის ყოფილ პრეზიდენტ ჟაირ ბოლსონარუს.

რამაგემი ABIN-ს (ბრაზილიის მთავარი სადაზვერვო სააგენტო) 2019 წლის ივლისიდან 2022 წლის მარტამდე ხელმძღვანელობდა.

ბრაზილიის უზენაესი სასამართლოს განჩინების თანახმად, რამაგემმა ABIN-ის სტრუქტურა პოლიტიკური ოპონენტების თვალთვალისა და საარჩევნო ადმინისტრაციაზე ზეწოლისთვის გამოიყენა, რათა ყოფილი პრეზიდენტი ჟაირ ბოლსონარუ ხელისუფლებაში დარჩენილიყო.

ABIN-ის ყოფილი თავკაცი ჩართული იყო ე.წ. „გადატრიალების გეგმაში“, რომელიც მიზნად ისახავდა სახელმწიფო გადატრიალების მოწყობას, რათა ჟაირ ბოლსონარუს ძალაუფლება შეენარჩუნებინა.

ალექსანდრე რამაგემი მიმალვაში იმყოფებოდა 2025 წლის სექტემბრიდან, როდესაც მან უკანონოდ დატოვა ბრაზილია, გადაკვეთა გაიანას საზღვარი და იქიდან ამერიკის შეერთებულ შტატებში გაემგზავრა.