„იმედის“ ეთერით უკვე გავაკეთე ამ საკითხზე კომენტარი და კიდევ ერთხელ ბოდიშს მოვუხდი საზოგადოებას. ეს არ არის კარგი საყურებელი, რა თქმა უნდა, ეს არ უნდა ხდებოდეს საქართველოს პარლამენტში, – განაცხადა გადაცემაში „დღის ქრონიკა“ იურიდიულ საკითხთა საპარლამენტო კომიტეტის თავმჯდომარე არჩილ გორდულაძემ პარლამენტში მომხდარ დაპირისპირებასთან დაკავშირებით.
გორდულაძის თქმით, ამავდროულად, არ უნდა ხდებოდეს ასეთი მოვლენების პროვოცირება.
„უწყვეტი კადრები არსებობს ამ „ნაც გახარიელების“ ერთმა თუ ორმა წარმომადგენელმა როგორ მოახდინა ამ ყველაფრის პროვოცირება, ეს იქნებოდა ხელების ქნევა და დარტყმის მცდელობები თუ უშვერი სიტყვებით ლანძღვა-გინება, მათ შორის ჩემი მისამართითაც. შემდეგ როგორ ცდილობდნენ ამ ყველაფრიდან გამოსვლას და საკუთარი თავის მსხვერპლად წარმოჩენას. ეს ყველაფერი არ გამოსდით“, – აღნიშნა მან.
რაც შეეხება რადიკალთა მოთხოვნას მომხდართან დაკავშირებით მოხდეს სამართლებრივი რეაგირება, არჩილ გორდულაძის თქმით, ისინი ცდილობენ ტყუილის შემოსაღებას, რომ მსხვერპლები იყვნენ.
„რეალურად, „ნაციონალურ მოძრაობაზე“ კიდევ უფრო ქვემოთ არის დაშვებული მათი განაყოფი „გახარიელები“ მათი პატრონის მითითებით, მათი პატრონის დავალებით გაქცეული ბელადისა და ახლა ცდილობენ რაღაცნაირად გამოძვრნენ ამ სიტუაციიდან. სიძულვილის ენაზე საერთოდ როგორ საუბრობენ. ესენი არიან ის ადამიანები, რომლებიც სიძულვილის ენის მხარეს დადგნენ“, – აღნიშნა მან.