ახლა ჩვენ გვაქვს ძალიან კარგი შანსი, რომ თვითაღიარებული რესპუბლიკების ლეგიტიმაცია საერთაშორისო დონეზე შეირყეს, – განაცხადა გადაცემაში „დღის ქრონიკა“ ისტორიკოსმა ნუკრი შოშიაშვილმა.
შოშიაშვილის თქმით, ნაურუ არის პატარა სახელმწიფო, რომელიც ძირითადად პრაგმატული პოლიტიკით გამოირჩევა იმ გაგებით, რომ ის ყიდის საკუთარ იურიდიულ აღიარებებს და მას არაერთხელ უქნია ასეთი სხვა სეპარატისტულ რეგიონებთან მიმართებაშიც.
„თავის დროზე, ცნობილია, რომ ეს აღიარება მან გაცვალა 50 მილიონ დოლარზე. რუსეთმა შესთავაზა ეს. ახლა ვხედავთ, რომ რუსეთს გარკვეულწილად სანქციები აქვს. ასევე უნდა ვთქვათ, ნაურუ დამოკიდებულია ავსტრალიაზე, ხოლო შეერთებულმა შტატებმა მიიღო გადაწყვეტილება, რომ ის სახელმწიფოები, რომლებმაც ჩვენი ოკუპირებული ტერიტორიები აღიარეს, ისინი გარკვეულწილად დასანქცირებულები უნდა იყვნენ. მგონია, რომ ერთი მხრივ რუსული გავლენები ამ რეგიონში არის შესუსტებული და ნაურუ, როგორც პრაგმატული, პატარა სახელმწიფო ცდილობს საკუთარი პოლიტიკა რაღაცნაირად გადააწყოს. მეორე, აბსოლუტურად პრაგმატული მიზეზებია, რომ არ უნდა რუსეთის სანქციებს შეუერთდეს და არ შეეხოს რუსული სანქციები არც ნაურუს.
ამიტომ, ეს ერთი მხრივ არის ქართული დიპლომატიის გამარჯვება, მაგრამ მეორე მხრივ, ახლა არის შანსი, რომ სირიაშიც და კიდევ სხვა სახელმწიფოებმა, რომლებმაც თავის დროზე აღიარეს აფხაზეთი და ე.წ. სამხრეთ ოსეთი, გამოიწვიონ ეს აღიარებები. ახლა ჩვენ გვაქვს ძალიან კარგი შანსი, რომ თვითაღიარებული რესპუბლიკების ლეგიტიმაცია შეირყეს საერთაშორისო დონეზე. ამიტომ, სამუშაო ჯერ კიდევ ბევრია“, – აღნიშნა მან.