აშშ-ის პრეზიდენტმა, დონალდ ტრამპმა განაცხადა, რომ ირანისთვის ეს „უკანასკნელი შანსია“ შეერთებულ შტატებთან „კარგ დოკუმენტს მოაწეროს ხელი“.
მან ეს განცხადება მას შემდეგ გააკეთა, რაც სპარსეთის ყურის მოკავშირეების თხოვნით იერიშები კიდევ ერთხელ გადადო და მოლაპარაკებების გაგრძელების პირობა დადო.
„ბევრმა ქვეყანამ დარეკა“, – განუცხადა ტრამპმა ჟურნალისტებს ოვალურ კაბინეტში. – „ყველას სურდა, ირანისთვის ეს უკანასკნელი შანსი მიეცათ. ეს მართლაც უკანასკნელი შანსია“.
ჟურნალისტების შეკითხვაზე, თუ რით განსხვავდება ეს შემთხვევა წინა შემთხვევებისგან, ტრამპმა უპასუხა: „მინდა, საბოლოო დარტყმამდე ყველა შესაძლო შანსი მივცე [ირანს]“.
ტრამპის თქმით, ირანთან მოლაპარაკებები „სწრაფად წარიმართება“. მან ივარაუდა, რომ ჰორმუზის სრუტე შესაძლოა სამშაბათისთვის სრულად გაიხსნას, რასაც იგი შეთანხმების „პირველ ფაზად“ მიიჩნევს.