საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე კორეის რესპუბლიკის საპარლამენტო დელეგაციის წევრებს შეხვდა.
სამინისტროს ცნობით, ვიზიტის მთავარი მიზანი საქართველოში დევნილთა საკითხებთან დაკავშირებული პრაქტიკისა და გამოცდილების გაზიარება იყო, რომელიც ქვეყანამ იძულებით გადაადგილებულ პირთა მხარდასაჭერად დააგროვა.
შეხვედრაზე მინისტრმა დელეგაციის წევრებს დევნილთა საჭიროებებზე ორიენტირებული პროგრამები გააცნო. საუბარი შეეხო საცხოვრებლით უზრუნველყოფის, სოციალურ-ეკონომიკური ინტეგრაციისა და საარსებო წყაროების განვითარების მიმართულებით განხორციელებულ პროგრამებს.
მიხეილ სარჯველაძის განცხადებით, დევნილთა საკითხებზე ზრუნვა სახელმწიფოს ერთ-ერთი პრიორიტეტული მიმართულებაა. მინისტრმა აღნიშნა, რომ სამინისტრო ახორციელებს არაერთ პროგრამას, რომლის მიზანია იძულებით გადაადგილებული პირებისთვის ღირსეული საცხოვრებელი პირობების შექმნა – მათ შორის, ქვეყნის ხუთ ქალაქში მასშტაბური საცხოვრებელი კომპლექსების მშენებლობა, ასევე „სოფლად სახლის“ პროგრამა და სხვა მხარდამჭერი პროექტები.
მინისტრის განცხადებით, მთავარი პრიორიტეტი დევნილთა საკუთარ სახლებში, საკუთარ ტერიტორიებზე უსაფრთხო და ღირსეულ პირობებში დაბრუნებაა. ამ გზაზე კი მნიშვნელოვანია საერთაშორისო პარტნიორების მხარდაჭერა და გამოცდილების გაზიარება, რაც დევნილთა საკითხების ეფექტიანად მართვასა და არსებული გამოწვევების დაძლევას უწყობს ხელს.
შეხვედრას ესწრებოდნენ მინისტრის მოადგილე გიორგი ცაგარეიშვილი და სოციალური დაცვის, დევნილთა და შრომის პოლიტიკის დეპარტამენტის უფროსი თათია გვარამაძე.