„რესპუბლიკური პარტიის“ თბილისის საკრებულოს სიის მეშვიდე ნომერი ნინო ბოლქვაძე საჭიროდ მიიჩნევს, რომ პოლიტიკაში ლგბტ თემის წარმომადგენლები მოვიდნენ. მისი განცხადებით, ისინი უკეთ შეძლებენ ამ თემის წინაშე არსებული პრობლემების წარმოჩენასა და მოგვარებას.
„საჭიროა, რომ პოლიტიკაში ლესბოსელი, გეი, ბისექსუალი და ტრანსგენდერი ადამიანები გამოჩნდნენ, იმიტომ რომ მათ ყველაზე კარგად იციან ის საკითხები და პრობლემები, რაც მათ აწუხებთ. ისინი შეძლებენ ამ პრობლემების წარმოჩენასა და ადვოკატირებას იმ დონეზე, სადაც მიიღება გადაწყვეტილებები.
ეს არის აბსოლუტურად აუცილებელი საზოგადოებისთვის, იმიტომ რომ ეს ყველას უსაფრთხოებას ეხება, რადგან რომელიმე ნიშნით ადამიანის სიცოცხლისთვის საფრთხის შექმნა გულისხმობს იმას, რომ ხვალ ნებისმიერი ადამიანის, ნებისმიერი მოქალაქის უფლებები იქნება დარღვეული“, – აცხადებს ნინო ბოლქვაძე.
ბოლქვაძის თქმით, „რესპუბლიკურმა პარტიამ“ თბილისის საკრებულოს სიაში მისი შეყვანით ლგბტ თემის ადამიანებს თავისუფალი სივრცე მისცა.
„რესპუბლიკურმა პარტიამ“ მოგვცა თავისუფალი სივრცე, ღირებულებებში ჩვენ, რა თქმა უნდა, ვემთხვევით. პარტია ვითარდება, აქვს პროგრესული ხედვა. არის საკითხები, სადაც თანამშრომლობის შესაძლებლობას ვხედავთ.
“უკვე მეექვსე წელია ლგბტ აქტივისტი ვარ. მდგომარეობა რთულდება. ეს მოძრაობა არის ახალგაზრდა, თუმცა მიღწევებთან და ხილვადობასთან ერთად, ისეთი გამოწვევების წინაშე დგას დღეს ეს თემი, როგორიც არის მკვლელობები. ამ ჩაგვრის შედეგად ადამიანები იღუპებიან, ხოლო ხელისუფლება იმის მაგივრად, რომ პოზიტიური ვალდებულებები შეასრულოს, პირიქით დისკრიმინაციულ კანონმდებლობას იღებს“- განაცხადა ნინო ბოლქვაძემ პირველ არხთან.
წყარო: “პირველი არხი”