გიორგი მღებრიშვილი – ყოველთვის მაოცებს ომბუდსმენის ასეთი დამოკიდებულება

შს მინისტრმა, გიორგი მღებრიშვილმა ომბუდსმენის მიერ დღეს გავრცელებული წინადადების კომენტირებისას აღნიშნა, რომ არ სურს ისეთი ავტორიტეტული ინსტიტუტი, როგორიც ომბუდსმენის აპარატია, კრიმინალების „გამპრავებელ“ კანტორად გადაიქცეს.
მისივე თქმით, ომბუდსმენს ამ საკითხზე ინფორმაციის გადამოწმება მათთან შეეძლო, სადაც აბსოლუტურად ამომწურავ პასუხს მიიღებდა.
„ბრალდებულებისგან მსგავსი ჩვენებები არ მიკვირს, ეს არც პირველია და არც ბოლო იქნება, მე, უბრალოდ, ყოველთვის მაოცებს ომბუდსმენის ასეთი დამოკიდებულება. მას შეეძლო ჩვენთან ამ ინფორმაციის გადამოწმება და მიიღებდა აბსოლუტურად ამომწურავ პასუხს, ჩვენ ვართ აბსოლუტურად გამჭვირვალე და ობიექტური, ტრანსპარენტულები და როდესაც ასეთი თემები გამოდის საჯაროდ, საჭიროა, მეტი სიფრთხილე და დაკვირვება, მით უმეტეს, როცა პოლიციელების მიმართებაში ვაკეთებთ განცხადებებს, მე არ მინდა, რომ ასეთი ავტორიტეტული ინსტიტუტი, როგორიც ომბუდსმენის ინსტიტუტია, გადაიქცეს კრიმინალების „გამპრავებელ“ კანტორად“, – განაცხადა შს მინისტრმა.
შეგახსენებთ, რომ სახალხო დამცველმა მთავარ პროკურორს ბრალდებულის მიმართ სავარაუდო არასათანადო მოპყრობის ფაქტზე გამოძიების დაწყების შესახებ წინადადებით მიმართა. პროკურატურის ცნობით კი, უწყება საქართველოს შინაგან საქმეთა სამინისტროს ცალკეული თანამშრომლების მხრიდან სამსახურებრივი უფლებამოსილების ძალადობით შესაძლო გადამეტების ფაქტზე აწარმოებს გამოძიებას, დანაშაულისთვის, რაც გათვალისწინებულია საქართველოს სსკ-ის 333-ე მუხლის მესამე ნაწილის „ბ“ ქვეპუნქტით.