ბაქო-თბილისი-ყარსის რკინიგზა შეცვლის ლანდშაფტს რეგიონში, დაახლოვებს ორ კონტინენტს – ევროპასა და აზიას, – ამის შესახებ საქართველოში თურქეთის ელჩმა ზექი ლევენთ გუმრუქჩუმ კარწახში ბაქო-თბილისი-ყარსის სარკინიგზო მაგისტრალის მარაბდა-კარწახის მონაკვეთის ინსპექტირების შემდეგ განაცხადა.
”ეს ისტორიული დღეა. ჩვენ გავხდით პირველი უწყვეტი სარკინიგზო მარშრუტის მოწმეები ბაქოდან ყარსამდე. ჩვენი აზერბაიჯანელი კოლეგები ბაქოდან თავიანთი მატარებლით ჩამოვიდნენ თბილისში, ჩვენ მათ აქ შევუერთდით დილით და განვაგრძეთ გზა ყარსისკენ. ეს არის ოცნება, რომელიც ხდება. ბაქო-თბილისი-ყარსი რკინიგზის მშენებლობას საფუძველი ათი წლის წინ ჩაეყარა და ახლა სრულდება. უპირველეს ყოვლისა, მინდა, მივულოცო ეს მნიშვნელოვანი მიღწევა მთავრობებსა და თურქეთის, აზერბაიჯანისა და საქართველოს მოქალაქეებს. ეს მხოლოდ სამი ქვეყნის დაახლოებას კი არ გამოიწვევს, არამედ ორ კონტინენტს – ევროპასა და აზიას უფრო მჭიდროდ დააკავშირებს ერთმანეთთან.
დღეს ბევრი შეხვედრა მქონდა და მინდა აღვნიშნო, რომ ძალიან ბევრი კლიენტი გვყავს, რომლებიც ამ მარშრუტის მოლოდინში არიან. ეს საცდელი გასვლა იყო, ხოლო დაახლოებით ერთი თვის თავზე კომერციული მატარებლები ივლიან ამ რკინიგზაზე, რომელიც ტვირთებს გადაზიდავს ჩინეთიდან, ყაზახეთიდან საქართველოს, აზერბაიჯანისა და თურქეთის გავლით. ეს ყოველივე შეცვლის მთლიან რეგიონს. მაგალითად, ყარსში, რომელიც ერთგვარად განვითარებად ქალაქადაა მიჩნეული, ეკონომიკის ბუმს ვიხილავთ. ასევე იქნება საქართველოში და აზერბაიჯანში. ძალიან ბედნიერები ვართ”, – განაცხადა ზექი ლევენთ გუმრუქჩუმ.