დღევანდელი დემარშით კარგად გამოჩნდა, როგორ ეწინააღმდეგებიან ხოშტარია-უდუმაშვილი თბილისელებისთვის მნიშვნელოვან პროექტებს, – ამის შესახებ საკრებულოს უმრავლესობის დეპუტატმა თამარ ტალიაშვილმა განაცხადა.
”მოვლენა, რომელიც აქ, საკრებულოში განვითარდა, იყო დადგმული, კარგად მომზადებული სცენარი, რომელსაც ჰქონდა ერთი პრაგმატული მიზანი – ხოშტარია-უდუმაშვილის პიარი. შედეგად მივიღეთ სრულიად სხვა, ძალიან დადებითი რამ იმ ინიციატივებთან დაკავშირებით, რომლებზეც დღეს იქნება მსჯელობა. საკრებულოში ხოშტარია-უდუმაშვილის მიერ დადგმული სპექტაკლით მოხდა სწორედ ორი მნიშვნელოვანი სიახლის გაპიარება. ამ ღონისძიებების ფართო აუდიტორიისათვის გაცნობა სწორედ ჩვენმა ოპონენტებმა უზრუნველყვეს, რისთვისაც დიდი მადლობა მათ! ერთი სიახლე არის ის, რომ პუშკინის გამზირთან, დედაქალაქის ცენტრში იგეგმება მრავალდონიანი მიწისქვეშა პარკინგის მშენებლობა, რომელსაც დიდი ხანია ელოდება თბილისის მოსახლეობა. მეორე – მოხდება თაბორის მთაზე არსებული 40 ჰექტარი მიწის ფართობის გამწვანება, რეკრიაციულ-დასასვენებელ სივრცედ მოწყობა. 4000 კვ. მეტრის ტერიტორიაზე ასევე განთავსდება სადრენაჟო და საირიგაციო სისტემის ფუნქციონირებისთვის აუცილებელი ტექნიკური შენობები, რომელიც უზრუნველყოფს ბოტანიკური ბაღის წყლით მომარაგებას. რა თქმა უნდა, ორივე პროექტი უმნიშვნელოვანესია დედაქალაქში სატრანსპორტო ქაოსის მოწესრიგებისა და ეკოლოგიის გაუმჯობესების კუთხით“, – განაცხადა თამარ ტალიაშვილმა.
თამარ ტალიაშვილის კომენტარს საკრებულოს პრესსამსახური ავრცელებს.