ჩვენ ყველა ერთად ავაშენებთ იმ ქვეყანას, რომელსაც ექნება თანამედროვე განათლება, სოფელი იქნება წელში გამართული და სიყვარულით იქნება გაერთიანებული, – ამის შესახებ საქართველოს პრემიერ-მინისტრმა, გიორგი კვირიკაშვილმა “ქართული ოცნების” საარჩევნო კლიპის პრეზენტაციაზე განაცხადა.
როგორც პრემიერ-მინისტრმა აღნიშნა, დღეს, პირველ ოქტომბერს არის გამარჯვების დღე.
“დღეს არის გამარჯვების დღე, როდესაც ჩვენ ქვეყანაში ადამიანებმა გაიმარჯვეს და სწორედ დღეს ჩვენ ერთად ვამბობთ, რომ ადამიანის ღირსებაზე მის ბედნიერებაზე გადის სახელმწიფოს პერსპექტივა და ქვეყნის მომავალი, ეს არის ჩვენთვის მთავარი. ის ვიდეორგოლი, რომელსაც ჩვენ ვნახავთ, რომელიც ჩემთვის არ არის ერთი პარტიის წინასაარჩევნო კლიპი, გაცილებით მეტია, სწორედ ადამიანზე საუბრობს, საუბრობს ჩვენს ქვეყანაზე, რომელიც შედგება ძალიან ლამაზი ადამიანებისგან. სწორედ ასეთი ადამიანები არავინ, ვინც ქმნიან ჩვენი ქვეყნის კიდევ უფრო უკეთეს ხვალინდელ დღეს. მიხარია, როდესაც ასეთ ვიდეორგოლს ნახავ შეუძლებელია არ აივსო ჩვენი ქვეყნის სიყვარულით, შეუძლებელია არ იგრძნო მისი მაჯის ცემა, გულის ცემა, შეუძლებელია, არ მოგინდეს კიდევ უფრო მეტი გააკეთო ჩვენი ქვეყნის მომავლისთვის. ეს არის ჩვენი ქვეყნის კუთხე, სიმდიდრე, სილამაზე, ჩვენ ყველა ერთად ავაშენებთ იმ ქვეყანას, რომელსაც ექნება თანამედროვე განათლება, სოფელი იქნება წელში გამართული და სიყვარულით იქნება გაერთიანებული, იქნება პროგრესული, იქნება განვითარებული. კიდევ ერთხელ გილოცავთ დღევანდელ დღეს, ადამიანობის გამარჯვების დღეს. მჯერა ჩვენი ხალხისა და ჩვენი ქვეყნის, რომელიც არის სიყვარულზე დაფუძნებული და სიყვარულით გაერთიანებული”, – აღნიშნა გიორგი კვირიკაშვილმა.