imedinews-ის ინფორმაციით, 51-ე სკოლის მოსწავლეებს შორის კონფლიქტი, რომელიც 1 დეკემბერს, ხორავას ქუჩაზე მოხდა და რომელსაც, საბოლოოდ ორი მოზარდის სიცოცხლე ემსხვერპლა, გუშინ სკოლის საპირფარეშოში დაიწყო.
დაუდასტურებელი ვერსიით, ერთ-ერთმა მოსწავლემ კლასელს სათამაშო პისტოლეტიდან პლასტმასის ტყვია ესროლა, რასაც კამათი მოჰყვა, რომელიც სკოლის ეზოში გაგრძელდა; ეზოში მოზარდებს შორის დაპირისპირება მანდატურმა განმუხტა, რის შემდეგაც მოსწავლეები სკოლის შენობაში დაბრუნდნენ, თუმცა მოგვიანებით ჩხუბი ხორავას ქუჩაზე განახლდა, როდესაც მოსწავლეს, რომელსაც “ტყვია” ესროლეს, სხვა სკოლიდან მეგობრებმა მიაკითხეს. საქმის გარჩევა ჩხუბში გადაიზარდა, რა დროსაც ერთი მოზარდი, რომელიც კლასელებს აშველებდა, დაჭრეს – ის საავადმყოფოში მიყვანამდე გარდაიცვალა. მეორე მოზარდი, რომელსაც სიცოცხლისთვის შეუთავსებელი ჭრილობები ჰქონდა, დღეს საავადმყოფოში გარდაიცვალა.
მოსწავლისთვის სასიკვდილო ჭრილობების მიყენებაში ბრალდებულის ვინაობა შინაგან საქმეთა სამინისტროს ინფორმაციით უკვე დადგენილია, მის დასაკავებლად ოპერატიულ-სამძებრო ღონისძიებები მიმდინარეობს. უკვე დაკავებულია კიდევ ერთი სავარაუდო დამნაშავე, რომელსაც, ამავე ინციდენტის დროს პირველივე დღეს დაღუპული მოზარდის განზრახ მკვლელობაში ედება ბრალი.
შემთხვევა 1 დეკემბერს დღის პირველ ნახევარში, ხორავას 4 ნომერში მოხდა.