მონტენეგროს გაწევრიანება არის საუკეთესო გზავნილი საქართველოსთვის, – ამის შესახებ თავდაცვის მინისტრმა თინა ხიდაშელმა განაცხადა.
„ორი ყველაზე მნიშვნელოვანი გადაწყვეტილება, რაც იქნება მთავარი ამბავი ვარშავის სამიტზე, ორივე საქართველოსთვის მნიშვნელოვანია. პირველი ეს არის, რომ ვარშავის სამიტზე ნატო ფართოვდება, მონტენეგროს გაწევრიანება არის საუკეთესო გზავნილი საქართველოსთვის იმის დასადასტურებლად, რაზეც ჩვენ ვსაუბრობთ, რომ შემდეგი გაჩერება საქართველო იქნება და მეორე – აღმოსავლეთ ევროპის წევრი ქვეყნების გაძლიერება და სამხედრო პოლიტიკა, რომელიც ამ ქვეყნებისთვის ხორციელდება, არის საუკეთესო დაცვა და ფარი ნატო-ს პარტნიორებისთვის. ამ სეგმენტში ჩვენთვის მნიშვნელოვანია ის სახელმწიფოები, რომლებიც შავ ზღვაზე არიან, ვინაიდან შავ ზღვაზე ნატო-ს გაძლიერება ნიშნავს საქართველოს უსაფრთხოების გაძლიერებას შავ ზღვაზე“, – განაცხადა თინა ხიდაშელმა.
თავდაცვის მინისტრმა ნატო-ს პოლიტიკაზეც ისაუბრა და აღნიშნა, რომ მას შემდეგ რაც ვარშავაში იქნება პოლიტიკური გადაწყვეტილება მიღებული, კონკრეტული გეგმის დასახვა მოხდება.
„ვარშავაში იქნება პოლიტიკური გადაწყვეტილება მიღებული და ამის შემდეგ იქნება ყველა კონკრეტული გეგმა. ერთ-ერთი რასაც ვითხოვთ, სამხედრო გემების რეგულარული ვიზიტები საქართველოში, ზუსტად ისე, როგორც ხდება თურქეთის ან ბულგარეთის პორტებში. საქართველოს პორტები უნდა გახდეს ნაწილი მარშუტის, ზუსტად ისე როგორც ნატო-ს წევრი ქვეყნები“, – განაცხადა თინა ხიდაშელმა.