თავდაცვის სამინისტრო გენერალ სამსონ ქუთათელაძის გარდაცვალების გამო მწუხარებას გამოთქვამს

საქართველოს თავდაცვის სამინისტრო მწუხარებას გამოთქვამს ეროვნული გვარდიის ყოფილი სარდლის, გენერალ სამსონ ქუთათელაძის გარდაცვალების გამო და სამძიმარს უცხადებს დაღუპულის ოჯახსა და ახლობლებს. 
სამინისტროს განცხადებით, სამსონ ქუთათელაძე საქართველოს შეიარაღებულ ძალებში 1992 წლიდან სხვადასხვა თანამდებობაზე მსახურობდა. 2004-2006 წლებში გენერალი ქუთათელაძე ეროვნული გვარდიის სარდალი იყო. 2006-2007 წლებში კი, საქართველოს შეიარაღებული ძალების გენერალური შტაბის განათლების დეპარტამენტს ხელმძღვანელობდა.
2008-2012 წლებში იყო საქართველოს პარლამენტის წევრი და საქართველოს პარლამენტის თავდაცვისა და უშიშროების კომიტეტის თავმჯდომარის მოადგილე. მონაწილეობდა საქართველოს ტერიტორიული მთლიანობისათვის ბრძოლებში ცხინვალის რეგიონსა და აფხაზეთის ომში (1992–1993), ასევე, სამშვიდობო ოპერაციაში, ერაყში.