“სითი პარკს” მერიის დადგენილება ოფიციალურად გადაეცა, რომლის თანახმად, თბილისის მუნიციპალიტეტი კომპანიასთან თანამშრომლობას წყვეტს. “სითი პარკის” იურისტებს დოკუმენტი დღეს ჩაბარდათ. კომპანიის იურისტი თამარ შუბითიძე აცხადებს, რომ ჯერ საქმის მასალები არ გადასცემიათ, ამიტომ სამართლებრივი ბრძოლის გზებზე ჯერჯერობით ვერ ისაუბრებენ.
“კომპანიას მხოლოდ დღეს ჩაბარდა თბილისის მთავრობის განკარგულება ხელშეკრულების გაწყვეტასთან დაკავშირებით. ამას აქვს კანონით დადგენილი გასაჩივრების ვადა. განკარგულების გამოგზავნის მიუხედავად კომპანიას არ ჩაბარებია საქმისწარმოების მასალები, კომპანია არ ყოფილა მონაწილე როგორც მხარე ადმინისტრაციული წარმოების, ამიტომ, ვიდრე წარმოების მასალებს არ მივიღებთ, რთულია ვისაუბროთ სამართლებრივი ბრძოლის გზებსა და ვადებზე. საქმის მასალები გუშინვე მოვითხოვეთ და იმედი გვაქვს დროულად გადმოგვცემენ მას, რათა დავამუშაოთ, გავაანალიზოთ და სარჩელი მოვამზადოთ”,– განაცხადა თამარ შუბითიძემ.