ნიკა მელიას თქმით,“ ნაციონალური მოძრაობის“ ხელისუფლებაში მოსვლის პირველ წელს პენსია 300 ლარი გახდება, ხოლო შემდეგ – 400 ლარი.
„განსაკუთრებით მინდა მივესალმო ჩვენს პენსიონერებს, რომლებიც ჩვენს ქვეყანაში ყველაზე მეტად იმსახურებთ იყოთ დაფასებულნი, რათა მთელი თქვენი ფასდაუდებელი ცოდნა, გამოცდილება და უნარები კიდევ უფრო მეტი ხალისით, მაღალი მოტივაციით და სავსე ენერგიით გადაეცეს მომდევნო თაობებს. თუმცა, ამავე დროს რბილად, რომ ვთქვათ, დასანანია იცოდე, რომ შენს სახელმწიფოში მაღლჩინოსნების ხელფასების ზრდის ფონზე, რომელსაც ალბათ თითოეული თვენგანი ძალიან დიდი გულისტკივილით ადევნებთ თვალ-ყურს, სახელმწიფოსგან საკუთარი ბედის ანაბარა არის მიტოვებული პენსიონერი. ჩვენ ასევე, სამწუხაროდ, ძალიან კარგად ვიცით ლარის გაუფასურებისა და ფასების ზრდის გამო, თქვენმა ისედაც ძალიან მწირმა პენსიამ თავისი მსყიდველობითუნარიანობა დაკარგა და დღეს თქვენ იმაზე ნაკლებ პენსიას იღებთ, ვიდრე 5 წლის წინ იღებდით. მაგალითად, 5 წლის წინ თუკი თქვენი პენსია დოლარში გამოხატული 90 დოლარს შეადგენდა, 5 წლის თავზე, დღეს თქვენი პენსია შეადგენს 70 დოლარს. ჩვენ ასევე ძალიან კარგად ვიცით თუკი ვინმეს ძალიან მტკივნეულად დაარტყა ფასების ზრდამ და ლარის გაუფასურებამ ეს ხართ თქვენ- პენსიონერები. ვიცი, რომ შემოსავლის უდიდესი ნაწილი იხარჯება გაზრდილ კომუნალურებზე და გაზრდილ ფასებზე. რა თქმა უნდა, იბადება კითხვა რას აკეთებს დღეს ხელისუფლება? რას აკეთებს დღეს „ქართული ოცნება“? მიუხედავად იმისა, რომ თქვენი პენსია მნიშვნელოვნად კარგავს მსყიდველობითუნარიანობას, „ქართული ოცნება“ მიმდინარე წელს, არც კი აპირებს პენსიის მატებას არც ერთი თეთრით. შეგახსენებთ, რომ მთელი 6 წლის განმავლობაში, „ქართულმა ოცნებამ“ მხოლოდ 30 ლარით გაზარდა პენსია და მთელ ეს 30 – ლარიანი ზრდა თავიდან ბოლომდე შეჭამა უკვე ინფლაციამ, ანუ ფასების ზრდამ“, – განაცხადა ნიკა მელიამ.