ქიმიური პროგრამის განადგურებასთან ერთად, ჩვენ გავგზავნეთ მკაფიო სიგნალი სირიისთვის და მისი მფარველებისთვის, რომ მსგავსი ფაქტის განმეორების შემთხვევაში მათ საფასურის გადახდა მოუწევთ – ეს განცხადება ამერიკის შეერთებული შტატების ვიცე-პრეზიდენტმა გააკეთა.
მაიკ პენსი ამბობს, რომ აშშ-ს ქმედება იყო მკაფიო გზავნილი რუსეთისა და ირანისთვის, რომ ქიმიური იარაღის გამოყენების შემთხვევაში ისინი უმკაცრეს პასუხის მიიღებენ.
„როდესაც პრეზიდენტმა გადაწყვიტა ემოქმედა, ჩვენ გავაკეთეთ ყველაფერი იმისთვის, რომ არამხოლოდ რეჟიმის ქიმიური პროგრამა გაგვენადგურებინა, არამედ გაგვეგზავნა მკაფიო გზავნილი სირიისთვის და ასევე მისი მფარველებისთვის – რუსეთისთვის და ირანისთვის, რომ თუ ისინი ოდესმე გამოიყენებენ ქიმიურ იარაღს – ამისთვის საფასურს გადაიხდიან. შეერთებული შტატები და ჩვენი მოკავშირეები არ შეეგუებიან ქიმიური იარაღის გამოყენებას უდანაშაულო ადამიანების წინააღმდეგ, ჩვენ მზად ვართ ავღკვეთოთ ასადის რეჟიმის მორიგი მსგავსი მცდელობა. ახლა რუსეთი გამიზნულად ავრცელებს დეზინფორმაციას ასადის ამაზრზენი ქმედებების შესახებ და ამ პროცესში საკუთარი მონაწილეობის შესახებ, მაგრამ მკვდარი ბავშვების და მოწამლული ხალხის საშინელი კადრები რეალურ სურათს გვაჩვენებენ. რუსეთის ტყუილს ჭეშმარიტება აცამტვერებს“-განაცხადა მაიკ პენსმა.