ირანი ბირთვული პროგრამის განახლების პირობას დებს. ამის შესახებ მუჰამედ ჯავად ზარიფმა CBS-სთან ინტერვიუში განაცხადა.
ირანის საგარეო საქმეთა მინისტრის განმარტებით, ოფიციალური თეირანი ამ ნაბიჯს იმ შემთხვევაში გადადგამს თუ აშშ-ი 6-მხრივი მოლაპარაკებების შედეგად გაფორმებული ისტორიული შეთანხმებიდან გავა.
აღსანიშნავია, რომ აშშ-ი 2015 წლის შეთანხმების გადახედვას ითხოვს. ოფიციალური ვაშინგტონი წინააღმდეგ შემთხვევაში შეთანხმების დატოვებით იმუქრება.
შეთანხმება თეირანს ბირთვული პროგრამის შეჩერებას ავალდებულებს.
ირანმა და ექვსმა შუამავალმა ქვეყანამ 2015 წლის 14 ივლისს ისტორიულ შეთანხმებას მიაღწიეს ირანული ატომის მრავალწლიანი პრობლემის დარეგულირების მიმართულებით. ამ შეთანხმების ფარგლებში მიიღეს მოქმედების გეგმა, რომლის საფუძველზეც ირანს აშშ-ის, ევროკავშირის და გაეროს უშიშროების საბჭოს მიერ დადებული ეკონომიკური და ფინანსური სანქციები უნდა მოხსნოდა. ეს გეგმა 2016 წლის 16 იანვრიდან ამოქმედდა.