გია ვოლსკი – ჩვენ არ გვინდა, საარჩევნოდ ისეთი დაპირებები გავცეთ, რომლებიც უახლოეს პერიოდში რეალიზებული არ იქნება

„ოთხი წლის პერიოდზე განსახორციელებელ დაპირებებთან დაკავშირებით, ცუდი გამოცდილება გვაქვს. ჩვენ არ გვინდა, საარჩევნოდ ისეთი დაპირებები გავცეთ, რომლებიც უახლოეს პერიოდში რეალიზებული არ იქნება“, – ამის შესახებ ჟურნალისტებთან საუბრისას ფრაქცია ”ქართული ოცნების” თავმჯდომარემ გია ვოლსკიმ განაცხადა.
”ოთხი წლის პერიოდზე განსახორციელებელ დაპირებებთან დაკავშირებით, ცუდი გამოცდილება გვაქვს და ცოტა უხერხულობა შეგვექმნა – ბევრი რამ შესრულდა, მაგრამ ბევრი რამ, მოულოდნელი განვითარებების გამო, ვერ შესრულდა. არის საკითხები, რომლებიც ვერ შესრულდა”, – აცხადებს ვოლსკი.
რაც შეეხება კონკრეტულად პენსიის თემას, რომლის თაობაზეც ”ქართული ოცნების” აღმასრულებელი მდივნის ირაკლი კობახიძის ინფორმაციით, დაპირება საარჩევნო პროგრამაში ჩაიდება, ვოლსკის თქმით, ”ეს დასათვლელია და ასე ადვილად ციფრების სროლა საჭირო არ არის”.
„საქართველოში ხორციელდება ძალიან ბევრი სოციალური პროგრამა. ბიუჯეტის 1/3 სოციალურ პროგრამებზე მიდის. შეიძლება პოპულისტებმა პენსიებთან დაკავშირებით დაპირებები იმის ხარჯზე გასცენ, რომ რაღაც დაფინანსება სოციალურ პროგრამებს მოაკლდება, მაგრამ ადამიანებით ასე თამაში, არ შეიძლება. ყველაფერი კარგად უნდა დაითვალოს”, – აღნიშნა ვოლსკიმ.