მინდა მადლობა შევწირო ღმერთს, რომელმაც მომივლინა მამა ეფრემი ათონის წმინდა მთიდან. ეს არის ღვთისაგან გამოგზავნილი პიროვნება და მე მას ვთხოვ, რომ გადასცეს ჩემი ლოცვა-კურთხევისა ათონის მთის მამებს, – ამის შესახებ სრულიად საქართველოს კათოლიკოს-პატრიარქმა დღეს განაცხადა, რომელიც ათონის მთაზე მდებარე ვატოპედის დიდი ლავრის წინამძღვარს, არქიმანდრიტ ეფრემს, რუს და უკრაინელ მღვდელმსახურებს მასპინძლობს.
„არის ადამიანი, რომელიც ანგრევს, არის ადამიანი, რომელიც აშენებს. არის ადამიანი, რომელიც ზრუნავს და არის ადამიანი, რომელიც არ ზრუნავს. ღმერთმა ინებოს, რომ ყოველი ჩვენგანი და ყოველი ადამიანი იყოს მაშენებელი, კეთილისმყოფელო, მშვიდობისმყოფელი. დღეს ჩვენ გვყავს დიდი სტუმრები. ნათქვამია ბრძენი ადამიანებისგან, რომ სტუმარი არის ღვთისაგან და მე ვუყურებ ამ სტუმრებს, როგორც ღვთისაგან გამოგზავნილ ადამიანებს. უპირველეს ყოვლისა, მინდა მადლობა შევწირო ღმერთს, რომელმაც მომივლინა მამა ეფრემი ათონის წმინდა მთიდან. ეს არის ღვთისაგან გამოგზავნილი პიროვნება და მე მას ვთხოვ, რომ გადასცეს ჩემი ლოცვა-კურთხევისა ათონის მთის მამებს. ჩვენთან დღეს ასევე არის ეპისკოპოსი რუსეთის ეკლესიისა. მრავალრიცხოვნად არიან სტუმრები უკრაინიდან. ჩვენ შევთხოვთ უფალს, რომ უკრაინა დამშვიდდეს, მშვიდობამ დაისადგუროს ამ ქვეყანაში“, – განაცხადა პატრიაქმა.