“პაპიძემ სასამართლოს გამოძიებაში მიცემული ჩვენებისგან განსხვავებული ჩვენება მისცა”, – ამის შესახებ პროკურორმა დავით ნეფარიძემ დახურული სხდომის დასრულების შემდეგ განაცხადა.
“ბრალდებულმა ისაუბრა 19 დეკემბრამდე პერიოდზე, ოთარ ბერძენიშვილთან ურთიერთობაზე, 19 დეკემბრის ღამეზე და მის შემდგომ პერიოდზე. თავისებური ახსნა აქვს მას არსებული რეალობის, თუმცა კონკრეტულ დეტალებზე ვერ ვისაუბრებ“, – განაცხადა დავით ნეფარიძემ.
პროცესი 1 ივლისს კვლავ პაპიძის დაკითხვით გაგრძელდება. პაპიძის დაკითხვის დასრულების შემდეგ პროცესი გაიხსნება და დაცვის მხარის მოწმეების დაკითხვა დაიწყება. ადვოკატებს სულ 4 მოწმე ჰყავთ დასაკითხი. მოწმეების დაკითხვის შემდეგ დასკვნითი სიტყვები იქნება, რის შემდეგაც ნაფიცი მსაჯულები ვერდიქტის გამოსატანად სათათბიროდ გავლენ.
პირველ სამ საათში მათ ვერდიქტი ერთხმად უნდა მიიღონ. თუკი ყველა მსაჯული გადაწყვეტილებას ერთხმად ვერ მიიღებს, მოსამართლე მათ 6-საათიან ვადას მისცემს. ამ დროში 8 მსაჯულის ხმაა საჭირო გადაწყვეტილების მისაღებად. თუკი გადაწყვეტილება მსაჯულებმა ვერც 6-საათიან ვადაში ვერ მიიღეს, მოსამართლე კიდევ 3 საათს მისცემს. ამ ვადაშიც 8 მსაჯულმა 4-ის წინააღმდეგ უნდა მიიღოს გადაწყვეტილება. თუ კვლავ ვერ მიიღეს გადაწყვეტილება, მოსამართლე მსაჯულებს დაითხოვს როგორც გადაწყვეტილების უუნაროს და ახალი შემადგენლობის არჩევა მოხდება.