სომხეთის პარლამენტი ჯერჯერობით მუშაობას ვერ იწყებს, რადგან სხდომაზე კვორუმისთვის აუცილებელი 53 დეპუტატის ნაცვლად, მხოლოდ 29 დარეგისტრირდა. ამის შესახებ ინფორმაციას “რია” ავრცელებს.
თუ დარეგისტრირებული დეპუტატების რაოდენობა კვორუმისთვის არასაკმარისია, მაშინ სხდომა გადაიდება, მაგრამ მხოლოდ 4 საათით.
პარლამენტის ბოიკოტის პარალელურად დემონსტრანტებმა განათლებისა და მეცნიერების სამინისტროს შესასვლელი მანქანებით გადაკეტეს. ჩახერგილია გზა „ზვარტნოცის“ აეროპორტისკენ. ერთ-ერთ გზატკეცილზე აქციის მონაწილეები სამართალდამცველებს დაუპირისპირდნენ. დემონსტრაციები იმართება ერევნის სხვა ნაწილშიც. ქუჩებში კვლავ გამოვიდნენ სტუდენტები.
მას შემდეგ, რაც გუშინ მმართველმა რესპუბლიკურმა პარტიამ ნიკოლ ფაშინიანის პრემიერმინისტრად არჩევას მხარი არ დაუჭირა, მან მომხრეებს მოუწოდა საყოველთაო გაფიცვა დაიწყონ, გადაკეტონ აეროპორტისკენ მიმავალი და სახელმწიფოთაშორისო გზები. ასევე დაბლოკონ მეტროპოლიტენი, სარკინიგზო მაგისტრალები და ქუჩები.
სომხეთში პოლიტიკურ კრიზისი მას შემდეგ დაიწყო, რაც პრემიერმინისტრი სერჟ სარგსიანი თანამდებობიდან გადადგა. ამას წინ 11-დღიანი საპროტესტო აქციები უძღოდა, რომელშიც დემონსტრანტები სერჟ სარგსიანის ხელისუფლებიდან წასვლას მოითხოვდნენ.