მთავარი პროკურორი ირაკლი შოთაძე „ცენტრ პოინტის“ დაზარალებულებს შეხვდება. პროკურორისა და დაზარალებული მენაშენეების შეხვედრა დღეს 13:00 საათზეა დანიშნული. ამის შესახებ 1tv წერს.
შეხვედრის მიზანს იმ საკითხების განხილვა წარმოადგენს, რომელიც კომპანია m2-სა და შუამავალ კომპანიას შორის დღემდე გადაუჭრელი რჩება.
„ცენტრ პოინტის“ დაზარალებულმა მარი ქოიავამ თქვა, რომ ეს საქმე იმდენად რეზონანსულია, რომ თუ მის მოგვარებაში სახელმწიფო ჩაერთვება, მაშინ მენაშენეების აქტივები მართვაში ეკონომიკის სამინისტროს უნდა გადაეცეს, რის შემდეგაც გამოცხადდება ტენდერი.
გავრცელებული ინფორმაციით, ხელშეკრულებით გათვალისწინებული წინაპირობების შესრულების შემთხვევაში, m² მხოლოდ სამუშაოების შემსრულებელი კომპანია იქნება, რომელსაც „ცენტრ პოინტი“ დაიქირავებს. სანაცვლოდ კი, „ცენტრ პოინტი“ m2-ს მის საკუთრებაში არსებულ თავისუფალ უძრავ ქონებას გადასცემს. ამასთან, დაზარალებულ ბინათმესაკუთრეებთან ურთიერთობის საკითხი კვლავ „ცენტრ-პოინტის“ პრეროგატივად დარჩება.
დაზარალებილებს “m2-თან” დასადები ხელშეკრულება არ მოსწონთ და დოკუმენტს ხელს არ აწერენ. მათი განცხადებით, თუ დაუმთავრებელ პროექტებს “„m2“” ამჟამად შეთავაზებული პირობებით გადაიბარებს, დაზარალებულების მდგომარეობა მნიშვნელოვნად არ იცვლება.
თბილისის საქალაქო სასამართლომ გასული წლის 31 მარტს მაია რჩეულიშვილს და რუსუდან კერვალიშვილს 4-4-წლიანი პატიმრობა მიუსაჯა. პროკურატურა “ცენტრ პოინტის” დამფუძნებლებს თაღლითობას და თანხების მითვისებას ედავებოდა.
გურამ რჩეულიშვილი 30 000-ლარიანი გირაოთი 6 აპრილს გაათავისუფლეს.
გასული წლის სექტემბერში imedinews-ი წერდა, რომ “ცენტრ პოინტის” აქტივებს სამშენებლო კომპანიები “X2” და “m²” ყიდულობდნენ, თუმცა მაშინ ეს ინფორმაცია კომპანიებმა უარყვეს.
ოქტომბერში გავრცელდა ინფორმაცია, რომ m2 ცენტრ პოინტს და მის აქტივებს არ ყიდულობს, არამედ მხოლოდ დაზარალებულების დაკმაყოფილების პროცესშია ჩართული.
იმედინიუსი