თბილისის მერმა კახა კალაძემ ბოტანიკურ ბაღში, თბილისის მერიის ახალი პლატფორმის „თბილისის ცის ქვეშ“ პრეზენტაციაზე განაცხადა, რომ ბოტანიკური ბაღის და წავკისის წყლის ხეობაში ველობილიკი და საფეხმავლო გზა გაკეთდება.
მისი თქმით, პროექტი ფონდი „ქართუს“ დაფინანსებით კეთდება და ის საჩუქრად გადაეცემა დედაქალაქს.
„დღეს ვიმყოფებით ბოტანიკურ ბაღში, სადაც არის შესანიშნავი გარემო. ძალიან მიხარია, რომ ბევრ ადამიანს, ბევრ ტურისტს ვხედავ ბოტანიკურ ბაღში. ძალიან მალე, ვიწყებთ მნიშვნელოვანი პროექტის განხორციელებას, კერძოდ, ბოტანიკური ბაღის და წავკისის წყლის ხეობაში ველობილიკი და საფეხმავლო გზა გაკეთდება. ეს ამ კონკრეტულ ადგილს მისცემს კიდევ უფრო მეტ შესაძლებლობას, რომ სწორად იყოს გამოყენებული. ამ პროექტს ფონდი „ქართუ“ საჩუქრად უკეთებს დედაქალაქს“, – განაცხადა კალაძემ.