შეზღუდული შესაძლებლობის მქონე პირთათვის განკუთვნილი ვაუჩერების საქმეზე დაკავებულებს სასამართლომ აღკვეთის ღონისძიების სახით გირაო შეუფარდა. როგორც imedinews-ს ფინანსთა სამინისტროს საგამოძიებო სამსახურში განუცხადეს, მერიის თანამშრომლებს 5 000, ხოლო კომპანიის წარმომადგენლებს 17 000 ლარის გირაო შეეფარდათ.
დიდი ოდენობით ფულადი თანხის თაღლითურად დაუფლების ფაქტზე ერთ-ერთი კომპანიის ორი ხელმძღვანელი, ხოლო სამსახურებრივი გულგრილობის ფაქტზე – ქალაქ თბილისის მუნიციპალიტეტის მერიის ჯანდაცვისა და სოციალური მომსახურების საქალაქო სამსახურის სამი თანამშრომელი პასუხისგებაში მისცეს.
ბრალდებულებმა ერთ-ერთი კომპანიის სახელით, 2017 წელს მონაწილეობა მიიღეს და გაიმარჯვეს ქალაქ თბილისის მუნიციპალიტეტის მერიის მიერ გამოცხადებულ ტენდერში, რომელიც ეხებოდა შეზღუდული შესაძლებლობების მქონე ბავშვთა და მოზარდთა საკურორტო (მთის კურორტი) მომსახურების შესყიდვას. კერძოდ, 179 000 ლარის ღირებულების საკურორტო მომსახურება თითქოსდა გაეწია 600 პირს, მაშინ როდესაც, გაწეული მომსახურების ამსახველ დოკუმენტებში დაფიქსირებულ პირთა ნაწილს მომსახურება საერთოდ არ მიუღია, ხოლო ნაწილმა არასრული მოცულობით მიიღო.