საქართველოს შინაგან საქმეთა სამინისტრომ, სამოქალაქო ავიაციის სააგენტოს სერვერზე კიბერთავდასხმის გამო, მოკვლევა დაიწყო. როგორც უწყებაში განმარტავენ, ამ ეტაპზე დამატებითი დეტალების გასაჯაროებისგან თავს იკავებენ.
“განხორციელდა კიბერშეტევა ჩვენს სერვერზე და სერვერი დაიბლოკა. ასევე დაიბლოკა ჩვენი პროგრამული უზრუნველყოფა და ზოგიერთი მონაცემი. ეს მონაცემები დარეზერვებული იყო, ეს ჩვენ შიდა მონაცემებს ეხება. მათზე წვდომა არ გვაქვს სერვერიდან გამომდინარე. ფაქტობრივად შეფერხება და შეყოვნება სერვისების მიწოდებაში არ გვაქვს. იმედია ყველაფერი აღდგება, დახმარება უკვე ვთხოვეთ შინაგან საქმეთა სამინისტროს და მიმდინარეობს შესაბამისი სამუშაოები,”- განაცხადა სამოქალაქო ავიაციის სააგენტოს დირექტორის მოადგილე ლევან კარანაძემ.
2 მაისს, საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს სერვერზე კიბერთავდასხმა განხორციელდა.
ახლა სამოქალაქო ავიაციის სააგენტო მუშაობას აგრძელებს ჩვეულ რეჟიმში. საავიაციო საწარმოებისთვის და სხვა დაინტერესებული პირებისთვის მომსახურების გაწევა გრძელდება შეფერხების გარეშე- აცხადებენ სამოქალაქო ავიაციის სააგენტოში.