თბილისის საქალაქო სასამართლომ “ქართული მარშის” ექვსივე წევრი პატიმრობაში დატოვა. მოსამართლემ დაკავებულების გიორგი ონიანის, ლუკა ნაცვლიშვილის, მიხეილ ამისულაშვილის, ლადო სადღობელაშვილის, ირაკლი დოლენჯაშვილის და ბექა რევაზიშვილისთვის შეფარდებული აღკვეთის ღონისძიება – პატიმრობა, ნაკლებად მკაცრი აღკვეთის ღონისძიებით არ შეცვალა.
ბრალდებულების ადვოკატების ნაწილი მათი დაცვის ქვეშ მყოფების გირაოს საფუძველზე გათავისუფლებას, ნაწილი კი აღკვეთის ღონისძიების გარეშე დატოვებას ითხოვდნენ, თუმცა მოსამართლემ დაცვის მხარის არც ერთი შუამდგომლობავარ დააკმაყოფილა. მოსამართლის გადაწყვეტილებას სხდომათა დარბაზში ხმაური მოჰყვა.
„ქართული მარშის“ წევრებმა და ბრალდებულების ახლობლებმა მოსამართლის მიერ მიღებული გადაწყვეტილება გააპროტესტეს. გარდა აღკვეთის ღობისძიების გადასინჯვისა, მოსამართლემ დღევანდელ პროცესზე პროკურატურის შუამდგომლობაც განიხილა წინასწარი გამოძიების ვადის გაგრძელებასთან დაკავშირებით. მოსამართლის გადაწყვეტილებით, წინასწარი გამოძიების ვადა ერთი თვით გაგრძელდა.
შეგახსენებთ, 18 მარტს გადაცემა „პოსტსკრიპტუმის“ წამყვანმა გიორგი გაბუნიამ აჭარაში ხეების მოჭრაზე გაკეთებულ სიუჟეტს ასეთი შესავალი გაუკეთა: „მე ვფიქრობ, რომ იესო ქრისტემ დიდი შეცდომა დაუშა, როდესაც საქადაგებლად 2000 წლის წინ ისრაელში მოვიდა. უნდა მოსულიყო 2-3 წელიწადში აჭარაში და ჯვარზე კი ვერ გააკრავდნენ, იმიტომ, რომ ჯვრის დასამზადებლად ხე აღარ იქნებოდა დარჩენილი. ამ დროისთვის ბიძინას ეზოში იქნება ყველა ხე გადარგული. ასე იცოცხლებდა იესო ღრმა სიბერემდე უხეო აჭარაში. მთავარია სადმე ბიძინასთვის არ გადაეკვეთა გზა, ან უარესი, მის ეზოში არ დაეწყო ქადაგება, თორემ იგივენაირად დაასრულებდა, როგორც 2000 წლის წინ, ან უარესად” .
19 მარტს, „რუსთავი 2“-ის წინ საზოგადოებრივი მოძრაობა „ქართული მარშის“ აქტივისტები შეიკრიბნენ და ტელევიზიის ეთერში გასულ გადაცემასთან დაკავშირებით პროტესტს გამოხატავდნენ. სწორედ ამ დროს განვითარებული მოვლენების დროს დააკავეს „ქართული მარშის“ აქტივისტები. „რუსთავი 2“–ის შენობის წინ მომხდარის გამო გიორგი ონიანს ბრალად ედება სისხლის სამართლის კოდექსის 120–ე, 126-ე და 239-ე მუხლების დარღვევა, ლუკა ნაცვლიშვილს – 187–ე და 239–ე მუხლების, ხოლო დანარჩენ სამ აქტივისტს: მიხეილ ამისულაშვილს, ლადო სადღობელაშვილსა და ირაკლი დოლენჯაშვილს 239–ე მუხლის დარღვევა.