ისრაელის პრემიერმინისტრის, ბენიამინ ნეთანიაჰუს წარმომადგენლის განცხადებით, 9 მაისს ის მოსკოვში შეხვდება რუსეთის პრეზიდენტს, ვლადიმირ პუტინს და რეგიონის საკითხებს განიხილავს. ინფორმაციას რადიო თავისუფლება ავრცელებს.
ამავე ინფორმაციით, ორი ლიდერის შეხვედრა შედგება კრემლში, მას შემდეგ, რაც ისრაელის პრემიერმინისტრი დაესწრება გამარჯვების დღის ტრადიციულ აღლუმს – რომლითაც აღინიშნება საბჭოთა კავშირის გამარჯვება ნაცისტურ გერმანიაზე.
ნეთანიაჰუ შეუერთდა აშშ-ის პრეზიდენტის, დონალდ ტრამპის მოწოდებას, რომ უნდა “გამოსწორდეს” ირანთან 2015 წელს მიღწეული ბირთვული შეთანხმების ნაკლოვანებები ხელშეკრულებას, რომლითაც თეირანს სანქციები მოეხსნა მისი ბირთვული პროგრამის შეკვეცის სანაცვლოდ, ხელი მოაწერეს რუსეთმა, აშშ-მა, საფრანგეთმა, გერმანიამ, ბრიტანეთმა და ჩინეთმა.
ვაშინგტონს ხელშეკრულებაში დარჩენისკენ მოუწოდებენ რუსეთი, საფრანგეთი, გერმანია, ბრიტანეთი და ჩინეთი – მათი შეფასებით, ეს შეთანხმება საუკეთესო საშუალებაა საიმისოდ, რომ ირანმა ვერ მოიპოვოს ატომური იარაღი.