40 მოსამართლის უვადოდ დანიშვნა კატასტროფა იქნება – ეს პროცესი არავითარ გამჭვირვალობასა და ანგარიშვალდებულებას არ მოიცავს, – ამის შესახებ ჟურნალისტებს იუსტიციის უმაღლესი საბჭოს წევრმა ანა დოლიძემ განუცხადა.
მისი თქმით, ამერიკის შეერთებული შტატების საელჩომ სასამართლო სისტემასთან დაკავშირებით გავრცელებულ განცხადებაში მკაფიოდ მიანიშნა, რომ აუცილებელია რეფორმა, ხოლო რეფორმამდე უვადო დანიშვნების მიმართ უნდა დაისვას კითხვის ნიშანი.
“საქართველოში ამერიკის შეერთებული შტატების საელჩოს მიერ გაკეთებული განცხადება არის ძალიან საინტერესო. ეს არის გამაფრთხილებელი განცხადება კანონმდებლებისათვის, რომ ბევრად უფრო სერიოზულად მოეკიდონ სასამართლო სისტემის რეფორმის და უპირველეს ყოვლისა, მოსამართლეთა უვადოდ დანიშვნის საკითხს. ეს არის უმთავრესი გამოწვევა სახელმწიფოს წინაშე, რომ სასამართლო ხელისუფლება იყოს მართლაც დამოუკიდებელი და კომპეტენტური კადრებით დაკომპლექტებული. დისციპლინური პასუხისმგებლობა მნიშვნელოვანია. ეს იქნება საშუალება, რომ სასამართლო ხელისუფლება იყოს ანგარიშვალდებული საზოგადოების წინაშე და არ არსებობდეს ბერკეტი მოსამართლეზე ზეწოლის. საკანონმდებლო პროცესი გვიჩვენებს, რამდენად მივა პარლამენტი ამ შედეგამდე”, – განუცხადა ჟურნალისტებს ანა დოლიძემ.